Tags-Kamar

kabhī rakh kar kisī zaanū pe sar ārām bhī kar lī
ghanī hai chhāñv kyuuñ khultā nahīñ band kamar terā

kamar us dilrubā kī dilrubā hai
nigah us ḳhush-adā kī ḳhush-adā hai

misāl-e-tār-e-nazar kyā nazar nahīñ aatā
kabhī ḳhayāl meñ mū-e-kamar nahīñ aatā

yuuñ chaḌhā juutā kas kamar ho chale
jab se gañgā ke paar jaate ho

qatl-e-qāsid pe kamar bāñdhī hai 'shola' us ne
ḳhat kitābat kī mulāqāt hai ye bhī na sahī

sar tak pahuñch na jaa.e koī tez-gām lahar
yaañ ḳhuuñ kī mauj tā-ba-kamar hai chale-chalo

paatā huuñ naaf kā kamar-e-yār meñ maqām
chashma magar adam meñ hai gauhar kī aab kā

na paḌo fikr-e-dahān-o-kamar-e-yār meñ tum
koī vāqif nahīñ ye ġhaib ke asrār haiñ sab

ḳhayāl-e-dahan ne kiyā tañg mujh ko
kamar ke tasavvur ne lāġhar banāyā

na qahr raftār-e-nāz Dhaa.e lachak na vaqt-e-ḳhirām aa.e
ḳhudā hī nāzuk kamar bachā.e ki pā.eñche vo sambhālte haiñ

kartī hai yaañ zabān-e-kamar yaar meñ kalām
ma.adūm hai javāb hamāre savāl kā

siikh legī bal kī lenā tā-kamar aane to do
bal abhī kartī nahīñ zulf-e-dotā achchhī tarah

khiñch sake hargiz musavvir se na timsāl-e-adam
dekh lo tasvīr-e-jānāñ tā-kamar shīshe meñ hai

hai imtihāñ sar par khaḌā mehnat karo mehnat karo
bāñdho kamar baiThe ho kyā mehnat karo mehnat karo

ai 'saḳhī' yaar ne dikhā.ī kamar
shab jo pūchhā adam ke kyā ma.anī

terī tarvār se koī na bachā
ab kamar kis upar tū kastā hai

vaañ kamar bāñdhe haiñ mizhgāñ qatl par donoñ taraf
yaañ saf-e-ushshāq haiñ zer-o-zabar donoñ taraf

be-takalluf gale lagā leñ ham
kaash ḳhanjar tirī kamar se gire

hastiyāñ nīstiyāñ yaañ bhī haiñ aisī jaise
vo kamar aur vo dahāñ kuchh nahīñ aur sab kuchh hai

merā dil-e-gum-gashta jo DhūñDā nahīñ miltā
vo apnā dahan apnī kamar dekh rahe haiñ