Tags-Kanta

kāñTā huuñ baaġh meñ to maiñ bijlī huuñ charḳh par
ye rañg-e-lāġharī hai vo shakl iztirāb kī

'kānhā' royā aaj maiñ jī bhar
dil kā ik ik kāñTā niklā

nāzish-e-gul huā kare koī
dil se kāñTā judā kare koī

dil meñ kāñTā sā kuchh chubhe hai mire
ki 'hasan' kis kī aah hai ye mizha

tirī nazar kī bahār-āfrīniyāñ taslīm
magar ye dil meñ jo kāñTā sā ik khaTaktā hai

be-sadā gumbad-e-ehsās huā mohr-ba-lab
phuul ke dard kā qissa koī kāñTā jaane

jab dil thā shagufta gul kī tarah Tahnī kāñTā sī chubhtī thī
ab ek fasurda dil le kar gulshan kī tamannā kaun kare

phuul kā zikr bhī karte hue Dar lagtā hai
phir na tū merī zabāñ par kahīñ kāñTā likh de

ek kāñTā bhī chhū nahīñ sakte
yuuñ to saarā chaman hamārā hai

ek kāñTā sā nikal jaa.e hamāre dil se
sansiyoñ se koī khīñche jo zabān-e-vā.iz

nāzukī ik gul-badan kī saath hai
ab agar pahlū meñ kāñTā hai to ho

raah meñ phuul khileñge to chubhan bhī hogī
ghar meñ baiThūñ to mirī aañkh kā kāñTā nikle

shabnam ko ret phuul ko kāñTā banā diyā
ham ne to apne baaġh ko sahrā banā diyā

ik kāñTā dil ko Dastā thā
maut se pahle hī

jis ke liye kāñTā sā chubhā kartā thā dil meñ
pahlū meñ vo aayā to gulistāñ kī tarah thā

do ghaḌī baiThe the zulf-e-ambarīñ kī chhāñv meñ
chubh gayā kāñTā dil-e-hasrat-zada ke paañv meñ

jism meñ ḳhvāhish na thī ehsās meñ kāñTā na thā
is tarah jaagā ki jaise rāt-bhar soyā na thā

pās-e-adab se ik ik kāñTā ham ne chunā hai palkoñ se
āḳhir kuchh tāzīm thī lāzim dasht-e-vafā ke ḳhāroñ kī

kahāñ dāman-e-husn āshiq se aTkā
gul-e-dāġh-e-ulfat meñ kāñTā nahīñ hai

kal ḳhvāb meñ dekhā sakhī maiñ ne piyā kā gaañv re
kāñTā vahāñ kā phuul thā aur dhuup jaise chhāñv re