Tags-Kanta

mujhe tajvīz karte ho ki ḳhāmoshī ibādat hai
chubhā jo kāñTā ḳhud ko shor phir kyuuñ tum machāte ho

maut aa.ī ishq meñ to hameñ niiñd aa ga.ī
niklī badan se jaan to kāñTā nikal gayā

vo ḳhushbū is ta.alluq se bahut bechain sī hogī
maiñ kāñTā thā magar ik phuul ke bistar meñ rahtā huuñ

ab to safar kā koī bhī maqsad nahīñ rahā
ye kyā huā ki paañv kā kāñTā nikal gayā

sajā ke rakh diyā kāñTā bhī mere pahlū meñ
kisī bahār ne mujh ko kabhī jo phuul kiyā

kāñTā sā jo chubhā thā vo lau de gayā hai kyā
ghultā huā lahū meñ ye ḳhurshīd sā hai kyā

paañv ke hamāre go kharosī
ik ik kāñTā khaTak gayā hai

nashtar jaisā andar ik chubhtā kāñTā hai
jaane us ne dukh bāñTā yā dil bāñTā hai

us kā inkār aise lagtā hai
jaise paañv meñ kāñTā lag jaa.e

jo tirī zulf pe jā kar na khile phuul vo kyā
jo na uljhe tire dāman se vo kāñTā kyā hai

na kyūñkar rashk-e-dushman se ḳhalish ho ḳhār-e-hasrat kī
ye vo kāñTā hai jis se paañv meñ kyā dil meñ chhāle haiñ

ahl-e-junūñ pe zulm hai pābandī-e-rusūm
jaada hamāre vāste kāñTā hai raah kā

kāñTā nikal bhī jā.egā jab vaqt aa.egā
kāñTe ke dil meñ bhī koī kāñTā chubhā to hai

jis ne dāman thāmā hogā
phuul nahīñ vo kāñTā hogā

jin logoñ ne ab tak mire hoñToñ ko siyā hai
sozan se mirī soch kā kāñTā bhī nikāleñ

apne dāman meñ koī phuul nahīñ
dil meñ kāñTā sā chubhā hai yaaro

jab gul kā siina chīrā
ḳhushbū kā kāñTā niklā

dil se kāñTā nikālne ke ba.ad
dard apnī kamī se duur huā

kāñTā sukhā ke hijr ne har-chand kar diyā
vo gul-badan mile to na phūlā samā.ūñ maiñ

na hasrat hī nikaltī hai na dil ko aag lagtī hai
mirī hastī mire dāman meñ kyā kāñTā lagā laa.ī