Tags-Kashmakash

isī kashmakash ne Duboyā jahāñ ko
unheñ jiit kyuuñ ho mujhe haar kyuuñ ho

baḌhne lagī yaqīn o gumāñ meñ jo kashmakash
va.ada bhī sub.h o shaam pe Taltā chalā gayā

hama kashmakash mirī zindagī kabhī aa ke dekh ye bebasī
tirī yaad vaj.h-e-sukūñ sahī vahī rāz-e-dīda-e-tar bhī hai

dushman ga.e to kashmakash-e-dostī ga.ī
dushman ga.e ki dost hamāre chale ga.e

mujhe ye kashmakash ye shor-o-ġhul sairāb karte haiñ
mirī kashtī ko dariyā aur dariyā ko bhañvar denā

ḳhud apnī zaat kā irfāñ na ho sakā mujh ko
abhī maiñ kashmakash-e-dām-e-hast-o-būd meñ huuñ

vo log kahāñ jaa.eñ jo kāfir haiñ na dīñ-dār
phir kashmakash-e-kāfir-o-dīn-dār chalī hai

rañj o rāhat kī kashmakash meñ 'shakīl'
umr ke qāfile guzarte haiñ

jaatī hai koī kashmakash andoh-e-ishq kī
dil bhī agar gayā to vahī dil kā dard thā

ummīd-o-bīm kī ye kashmakash hai rāz-e-hayāt
sukūñ-navāz haiñ is ke sivā sahāre kyā

ye dil ajiib sī ik kashmakash se hai do-chār
natīja ek sā hogā ise jahāñ le jā.ūñ

jab dil ko ta.alluq na rahā kū-e-sanam se
ye kashmakash-e-tark-o-talab kis ke liye hai

paḌā kis kashmakash meñ yaar ke ghar raat maiñ jā kar
na uTh kar mudda.ī jaa.e na merā mudda.ā nikle

guzar rahī hai ajab kashmakash meñ merī hayāt
na chain ghar ke hai andar na ghar ke hai bāhar

rāz-e-darūn-e-āstīñ kashmakash-e-bayāñ meñ thā
aag abhī nafas meñ thī sho.ala abhī zabāñ meñ thā

guzrā huuñ zindagī kī har ik kashmakash se maiñ
dil ko harīf-e-gardish-e-daurāñ kiye hue

nazar ho ḳhvāh kitnī hī haqā.eq-āshnā phir bhī
hujūm-e-kashmakash meñ aadmī ghabrā hī jaatā hai

hālāñki pahle saa.e se rahtī thī kashmakash
ab apne bojh se hī dabā jā rahā huuñ maiñ

zindagī kī kashmakash 'bāqī' na pūchh
niiñd jab aatī hai so jaate haiñ ham

roz kī kashmakash ke sho.aloñ meñ
aag bhī maiñ rahūñ havā bhī rahūñ