Tags-Kashmakash

masrūr ho rahe haiñ ġham-e-āshiqī se ham
kyuuñ tañg hoñge kashmakash-e-zindagī se ham

kaise uḌuuñ maiñ kyā uḌuuñ jab koī kashmakash sī ho
mere hī bāzuoñ meñ aur mere paroñ ke darmiyāñ

zehn aur dil meñ chheḌ gayā koī sard jañg
ik sail-e-kashmakash ke muqābil khaḌā huuñ maiñ

ajiib kashmakash-e-jabr-o-iḳhtiyār rahī
ġham-e-hayāt isī darmiyān se niklā

safar meñ kashmakash-e-marg-o-zīst ke daurān
na jaane kis ne mujhe zindagī atā kī thī

yārān-e-safar haiñ tez-qadam ai kashmakash-e-dil kyā hogā
ruktā huuñ to bichhḌā jaatā huuñ chaltā huuñ to chalnā mushkil hai

kashmakash meñ infirādiyyat zarūrī hai 'sabā'
jis taraf koī nahīñ hotā udhar ho jā.iye

ajab kashmakash hai ajab hai kashākash ye kyā biich meñ hai hamāre tumhāre
zarūrat zarūrat zarūrat zarūrat zarūrat kī ḳhātir marāsim haiñ saare

aaj tire savāl par phir mire lab ḳhamosh haiñ
aisī hī kashmakash thī kuchh pahlī nazar ke baad bhī

ma.āl-e-kashmakash-e-dard kuchh huā 'hirmāñ'
sunā hai maut kī ik niiñd le rahā huuñ maiñ

zindagī kashmakash-e-vaqt meñ guzrī apnī
din ne jiine na diyā raat ne marne na diyā

halāk-e-kashmakash-e-rā.egāñ bahut se haiñ
ki zindagī hai to kār-e-ziyāñ bahut se haiñ

jis meñ amal kā josh nahīñ vo shabāb kyā
mastī to dil meñ chāhiye shaġhl-e-sharāb kyā

is jahān-e-āb-o-gil par Dāltā huuñ jab nazar
zindagānī ko sarāsar kashmakash paatā huuñ maiñ

kashmakash meñ haiñ tinke chhappar ke ḳhaak ho jaa.eñ yā ThiThurte raheñ
barq hī barq hai fazāoñ meñ os hī os hai nasheman par

phir kashmakash-e-sūd-o-ziyāñ kār-e-ziyāñ hai
jab jiit bhī Thahrī hai hazīmat ke barābar

raat yuuñ guzartī hai kashmakash ke māroñ kī
ik diyā jalāte haiñ ik diyā bujhāte haiñ

dil jaañ nisār-e-mai hai zabāñ tā.ib-e-sharāb
is kashmakash meñ ruuh kī tāzīr ho ga.ī

na hogī ḳhatm phir bhī kashmakash shaiḳh-o-barahman kī
agar ham-rishta-e-tasbīh bhī zunnār ho jaa.e

'amjad' nashāt-e-zīst isī kashmakash meñ hai
marne kā qasd jiine kā azm ek saat kar