Tags-Kashmakash

umīd-o-yās meñ ye roz-o-shab kī kashmakash tauba
ba-har-lamha fareb-e-gardish-e-ayyām kyā kahiye

fareb-ḳhurda-e-paimān-e-yār honā thā
rahīn-e-kashmakash-e-intizār honā thā

ghabrā.e kyuuñ na kashmakash-e-naz.a se 'diler'
pahlā ye ittifāq use umr bhar meñ hai

is kashmakash meñ terī galī se pare rahe
aa.e kahāñ pe harf kahāñ par na aa.e harf

mujhe muddatoñ yahī vahm thā ki ye ḳhaak kīmiyā ban ga.ī
isī kashmakash meñ guzar ga.ī ki fuġhāñ karūñ to asar bhī hai

na is ke saath hamārā bhī mol hone lage
haiñ kashmakash meñ ki musht-e-guhar kahāñ kholeñ

hama kashmakash mirī zindagī kabhī aa ke dekh ye bebasī
tirī yaad vaj.h-e-sukūñ sahī vahī rāz-e-dīda-e-tar bhī hai

-āsāñ nahīñ hai kashmakash-e-zāt kā safar
hai āgahī ke ba.ad ġham-e-āgahī bahut

zindagī aur maut meñ ik umr se thī kashmakash
vaqt par do hichkiyoñ ne paak jhagḌā kar diyā

zarā zarā sī baat par bichhaḌ gayā jo be-sabab
anā va zid kī kashmakash meñ ham yahāñ vahāñ rahe

ummīd-o-bīm, ishrat-o-usrat ke darmiyāñ
ik kashmakash kuchh aur thii, kuchh thā kuchh aur thā

ḳhayāl-e-jubba-o-dastār bhī nahīñ baaqī
vo kashmakash hai ki ik taar bhī nahīñ baaqī

baḌhne lagī yaqīn o gumāñ meñ jo kashmakash
va.ada bhī sub.h o shaam pe Taltā chalā gayā

ye ravayya sahī nahīñ hotā yuuñ hameñ kashmakash meñ mat Daalo
yā hameñ sach kī tarah apnā lo yā bhulā bhī do ḳhvāb kī sūrat

masrūr ho rahe haiñ ġham-e-āshiqī se ham
kyuuñ tañg hoñge kashmakash-e-zindagī se ham

saḳht-jānī apnī qismat zañg ḳhanjar kā nasīb
kashmakash meñ jaan hai 'afzal' magar kyā kījiye

koī kashmakash nahīñ thī ġham-e-dushmanī se pahle
mujhe ḳhauf hī kahāñ thā tirī dostī se pahle

mirā safīna ajab kashmakash meñ tairtā thā
havā sukūt meñ thī bādbān se uupar

'sayyadī' tārīḳh meñ ik do baras kuchh bhī nahīñ
kashmakash hai iztirāb-e-dā.imī mātam na kar

hamārī to kaTegī kashmakash meñ
chahak tum bhī uThogī jānte haiñ