Tags-Kashmakash

agar ye kashmakash baaqī rahī jahl o tamaddun kī
zamāna chhīn legā daulat-e-ilm-o-yaqīñ mujh se

kab milegī mujh ko 'sārim' is aziyyat se najāt
zehn-o-dil kī kashmakash meñ raat din uljhā huuñ maiñ

ye kashmakash jo man-o-tū ke darmiyāñ hai so hai
miyān-e-sūd-o-ziyāñ hai mujhe nahīñ mālūm

huā hai dair-o-haram meñ jo mo.atakif vo yaqīn
takān-e-kashmakash-e-ehtimāl hai shāyad

sukūñ hāsil hai din meñ aur na shab ko chain miltā hai
ki ab to kashmakash meñ zindagī hai aur bas maiñ huuñ

ye zindagī hai apnī kabhī ḳhush kabhī udaas
is kashmakash se mujh ko ḳhudāyā rihā.ī de

un kī aamad kī ḳhabar sun kar hujūm-e-shauq se
kashmakash hai ḳhāna-e-dil meñ bhare ghar kī tarah

soz-e-ġham de ke mujhe us ne ye irshād kiyā
jā tujhe kashmakash-e-dahr se āzād kiyā

rakhvā ke zulfeñ yaar ne lākhoñ hī murġh-e-dil
paidā kiye haiñ kashmakash-e-dām ke liye

kashmakash meñ huuñ karūñ tark-e-ta.alluq kaise
us sitamgar pe mire dil ko bharosa bhī to hai

jo husn-e-kashmakash hai dar-tah-e-āb
subuk-sārān-e-sāhil se kaheñge

din kaT rahe haiñ kashmakash-e-rozgār meñ
dam ghuT rahā hai sāya-e-abr-e-bahār meñ

raat maiñ is kashmakash meñ ek pal soyā nahīñ
kal maiñ jab jaane lagā to us ne kyuuñ rokā nahīñ

tañg aa chuke haiñ kashmakash-e-zindagī se ham
Thukrā na deñ jahāñ ko kahīñ be-dilī se ham

fitrat ne de ke ishq ko ehsās-e-zabt-e-shauq
uljhā diyā hai kashmakash-e-lā-zavāl meñ

kashmakash-hā-e-alam se ab ye 'hasrat' jī meñ hai
chhuT ke in jhagḌoñ se mehmān-e-qazā ho jā.iye

ye kaisī kashmakash hai zindagī meñ
kisī ko DhūñDte haiñ ham kisī meñ

tū ḳhvāb hai ehsās hai naġhma hai ki gul hai
ye kashmakash-e-vahm-o-gumāñ maar na Daale

kashmakash-e-hayāt hai sāda-diloñ kī baat hai
ḳhvāhish-e-marg bhī nahīñ zahr-e-sukūñ bhī chāhiye