Tags-Kashmakash

kashmakash-e-nañg-o-nām dahr meñ jiinā harām
naam kī ye jiit haar dekhiye kab tak rahe

kashmakash vo junūn-o-hosh meñ hai
ban gayā husn bhī tamāshā.ī

ye kashmakash alag hai ki kis kashmakash meñ huuñ
aatā nahīñ samajh meñ bahut sochtā huuñ maiñ

zindagī kī kashmakash se dast-kash honā paḌā
naza.a meñ yaad aa ga.ī jab un kī añgḌā.ī mujhe

har-chand tirā ahd-e-vafā bhuul ga.e ham
vo kashmakash-e-sabr-talab yaad rahegī

ajab kashmakash hai ki jiinā na marnā
'sahar' us se kah do ki kam yaad aa.e

ab kashmakash ke bojh kī tāqat nahīñ rahī
ab dil meñ koī aas na jaage ḳhudā kare

māyūs bhī to karte nahīñ tum za-rāh-e-nāz
tañg aa ga.e haiñ kashmakash-e-imtihāñ se ham

shab-e-intizār kī kashmakash meñ na pūchh kaise sahar huī
kabhī ik charāġh jalā diyā kabhī ik charāġh bujhā diyā

mohlat kuchh aur kashmakash-e-intizār de
aa jaa.e kuchh ḳhayāl use kyā ajab kabhī

is tilism-e-dahr meñ sar bhī uThā sakte nahīñ
kashmakash meñ sair-e-nairañg-e-jahāñ kyuuñ kar kareñ

kitnā baḌā azaab hai bātin kī kashmakash
ā.īna sab kā garmī-e-jauhar se kaT gayā

raat phir kashmakash meñ guzrī hai
thoḌā batlā deñ yā chhupā.eñ sab

nabūd-o-būd kī is kashmakash meñ
ajab hai hālat-e-paiham azīzam

is kashmakash meñ ḳhatm huā raat kā safar
zid thī mirī to us kī hayā kā savāl thā

kabhī vahshat-zada māhaul meñ apne hī saa.e se
hujūm-e-kashmakash meñ aadmī ghabrā hī jaatā hai''

tañg aa ga.e haiñ kashmakash-e-āshiyāñ se ham
ab jā rahe haiñ aap ke is gulistāñ se ham

manzil na milī kashmakash-e-ahl-e-nazar meñ
is bhiiḌ se maiñ apnī nazar le ke chalā huuñ

tan fart-e-latāfat se ho jab rūh-e-mujassam
kyā zor chale kashmakash-e-band-e-qabā kā

ye johd-o-kashmakash ye ḳharosh-e-jahāñ bhī dekh
adbār kii, saroñ pe ghanī badliyāñ bhī dekh