Tags-Kashti

akelā chhoḌ ke tūfān ko guzar jaa.e
ye be-ruḳhī mirī kashtī ko kab gavārā hai

vo āñkheñ hī aisī thiiñ ham Duub ga.e anjāne meñ
jaan ke kis ne TūTī-phūTī kashtī meñ tūfān liyā

fareb-e-amn meñ kuchh maslahat to hai varna
sukūn-e-kashtī o taufīq-e-nā-ḳhudā ma.alūm

kabhī merī talab kachche ghaḌe par paar utartī hai
kabhī mahfūz kashtī meñ safar karne se Dartā huuñ

tūfāñ se kheltī huī kashtī guzar ga.ī
har chand bādbān uḌā le ga.ī havā

paar bhī kar na sakā bahr-e-junūñ se kam-baḳht
aur dil ziist kī kashtī ko Dubo bhī na sakā

kashtī vo liye nuuh kī mānind chale aa.eñ
tūfān bapā kar shab-e-furqat meñ arī aañkh

kabhī ġharq kar de safīne hazār
kabhī ek kashtī tarātā hai tū

savār-e-kashti-e-amvāj-e-dil haiñ aur ġhāfil haiñ
samajhte haiñ ki ham dariyā-e-ġham ke paar baiThe haiñ

jo apnī kashtī pe bach rahegā
vahī alaihissalām hogā

ai mire pāyāb dariyā tujh ko le kar kyā karūñ
nāḳhudā patvār kashtī bādbāñ rakhte hue

nā-ḳhudā kī jo niyyat thī zāhir huī
jab bhī kashtī mirī aa.ī girdāb meñ

jahāñ Duubī thī kashtī aarzū kī
usī girdāb meñ niklī ubhar kar

maiñ nai liyā baġhal meñ parī-rū visāl ko
dev-e-firāq kashtī meñ mujh se bichhaḌ gayā

kashtī meñ so ga.e jo unheñ ye ḳhabar kahāñ
kitnā hai aaj zor-e-havā bādbān par

karūñ ai 'mauj' kyā ummīd-e-sāhil
ki ab tūfāñ meñ kashtī ghirī hai

ik chāñd kī kashtī hī nahīñ Dūbne vaalī
varna vo samundar to balā-ḳhez bahut hai

āñkhoñ pe e'tibār na kar fāsla to dekh
dariyā ke paar kyā hai ye kashtī batā.egī

use batānā ki apne dariyāoñ kī hifāzat ke kaam aa.e
vo peḌ kashtī bane hue haiñ jinhoñ ne sahrā meñ nam rakhā thā

kashtī hai ghaaT par tū chale kyuuñ na duur aaj
kal bas chale chale na chale chal uThā to lā