Tags-Kashti

na tairtī thī na jo Dūbtī thī muddat se
havāle kashtī ko mañjdhār kar ke aayā huuñ

koī Duubī huī kashtī hai ki sāhil kā nishāñ
apnī sochoñ ke samundar se ubhar kar dekho

bhañvar jab bhī kisī majbūr kashtī ko Dubotā hai
to apnī bebasī par duur se sāhil taḌaptā hai

us kī shab-e-firāq meñ itnā tū ro ki ho
dariyā-e-ashk meñ tirī kashtī tabāh chashm

ishq kī naav paar kyā hove
jo ye kashtī tare to bas Duube

kyuuñ ye kashtī Dol rahī hai lahroñ par
TuuTā hai is kashtī kā patvār kahāñ

haath malte rah ga.e saare bhañvar
aur kashtī ne kinārā kar liyā

ye merī kāġhzī kashtī hai aur ye maiñ huuñ
ḳhabar nahīñ ki samundar kā faisla kyā hai

ye apne ḳhuun kī lahroñ meñ Dūbtī kashtī
bhañvar se bhaag ke sāhil pe jā paḌī hogī

tūfān-e-balā kī maujoñ meñ kiiñ band āñkheñ aur phāñd paḌe
kashtī ne jahāñ Takkar khaa.ī dil bol uThā sāhil hī to hai

dhartī aur ākāsh kī duniyā meñ jīvan
do tūfānoñ meñ qaidī kashtī sā hai

ġhārat-garī-e-zor-e-talātum are ġhazab
kashtī ke bādbān havāoñ se phaT ga.e

mirā dil Dūbne lagtā hai jab ġham ke samundar meñ
mirī kashtī ko sāhil se lagāne kaun aatā hai

dil kī zamīñ tak raushniyāñ thīñ, chehre the, hariyālī thī
ab to jahāñ bhī sāhil paanā kashtī ko Thahrā denā

jabīñ ke nīche do kashtī meñ bāñdh lī hai nadī
zarūr legī ye ik din ufaan niklegī

sharmā.egā ab tā-hashr tūfāñ
TuuTī huī ik kashtī Dubo kar

biich dariyā ke ajab jashn bapā hai yaaro
saath kashtī ke koī mauj-e-balā chaltī hai

bajā ki kashtī hai paara paara thapeḌe tūfāñ ke khā rahā huuñ
magar ye e.azāz kam nahīñ hai ki aap hī apnā nāḳhudā huuñ

ġhabġhab se bachā dil to zanaḳhdān meñ Duubā
girdāb meñ kashtī ga.ī tūfāñ se nikal kar

be-bas kashtī paḌh letī hai fitrat kī vo bhī tahrīr
mauj-e-balā jab āb-e-ravāñ par koī ishāra likhtī hai