Tags-Kashti

muhīt-e-ishq meñ hai kyā umiid o biim mujhe
ki Duub Duub ke kashtī mirī nikaltī hai

ḳhaak kī kashtī tale sone kā sāġhar jam gayā
dīda-e-be-ḳhvāb meñ ḳhvāb-e-sikandar jam gayā

dekhī ga.ī na mujh se jo tūfāñ kī bebasī
kashtī ko apnī aap Dubonā paḌā mujhe

kashtī ravāñ-davāñ thī samundar khulā huā
āñkhoñ meñ bas gayā hai vo manzar khulā huā

mañjhdār meñ the aur Dar ye thā ki Duub hī jā.eñge ab ham
maujoñ meñ jo lahrā.ī kashtī tinkoñ ke sahāre aa pahuñche

vahī ġharqāb hoñge ham vahī kashtī na Dūbegī
agarche nāḳhudā is sach ko jhuTlāne hī vaalā hai

ek kashtī kī hai talab 'rāhī'
ishq dariyā ke paar hai mujh ko

sahārā hai kahāñ yārab tire kashtī-shikastoñ kā
nikal aatī hai mauj āḳhir jise sāhil samajhte haiñ

vaqt ke bahte hue dariyā pe kashtī Daal kar
saare andeshoñ se ḳhud ko be-ḳhabar rahne diyā

bin piir pahuñchā nahiñ kabhī kui sāhil-e-maqsūd ko
mallāh bin kashtī kahīñ hotī hai dariyā paar kab

sad-kamāl-e-mehrbānī pāniyoñ ne is daf.a
kāġhzī kashtī ko lahroñ par ravāñ rahne diyā

mujhe ye kashmakash ye shor-o-ġhul sairāb karte haiñ
mirī kashtī ko dariyā aur dariyā ko bhañvar denā

TuuTī hai ye kashtī to mire saath safar ko
vo jān-e-masāfat mirā tayyār huā hai

aaj dariyā meñ ajab shor ajab halchal hai
kis kī kashtī ne qadam āb-e-ravāñ par rakkhā

tārīk hai raat aur duniyā zaḳhḳhār
tūfān bapā hai aur kashtī be-kār

jab bhī kashtī mirī sailāb meñ aa jaatī hai
maañ duā kartī huī ḳhvāb meñ aa jaatī hai

narm āvāzoñ ke sailāb meñ ai kaash kabhī
hādsa ho koī kashtī kisī sāhil se kahīñ Takrā jaa.e

karte na the jo sāhil o dariyā meñ imtiyāz
kashtī bhañvar meñ aa.ī to vo nāḳhudā hue

kaise likh duuñ maiñ tire naam fasāna koī
beach mañjdhār meñ kushtī ko Dubāne vaale

kisī bachpan meñ banā.ī huī kashtī jaisā
saath terā thā magar dhuup kī narmī jaisā