Tags-Khafa

ab to har shahar meñ us ke hī qasīde paḌhiye
vo jo pahle hī ḳhafā hai vo ḳhafā aur sahī

jī rahe the ham to duniyā thī ḳhafā
mar ga.e to der tak mātam rahā

pahle ham meñ the aur ab ham se judā rahte haiñ
aap kaahe ko ġharīboñ se ḳhafā rahte haiñ

is ghūmtī zamīn kā mehvar hī toḌ do
be-kār gardishoñ pe ḳhafā ho rahe ho kyuuñ

mirī kashtī kabhī ġharqāb kī thī
abhī tak maiñ samundar se ḳhafā huuñ

dam nikal jaa.e ḳhafā ho ke ġham-e-kākul meñ
jo paḌe halq meñ phandā vo galā ghuuT paḌe

koī sabab to hai aisā ki ek umr se haiñ
zamāna mujh se ḳhafā aur maiñ zamāne se

kab talak jī ruke ḳhafā hove
aah kariye ki Tak havā hove

āsmāñ kī fikr kyā āsmāñ ḳhafā sahī
aap ye batā.iye aap to ḳhafā nahīñ

kyā tujhe ilm nahīñ terī razā kī ḳhātir
maiñ ne kis kis ko zamāne meñ ḳhafā rakkhā hai

ḳhafā haiñ is liye vo ham se farmā.ish nahīñ karte
so ham bhī dhuup aur saa.e kī paimā.ish nahīñ karte

jiinā hai to ye jabr bhī sahnā hī paḌegā
qatra huuñ samundar se ḳhafā ho nahīñ saktā

koī jā kar 'riyāz' ko samjhā.e
kuchh ḳhafā haiñ vo apnī jaan se aaj

jab kahā ham ḳhafā haiñ jaan se aaj
bole ḳhush kar deñ imtihān se aaj

vo sanam ka.ī din se hai mujh se ḳhafā nahīñ aatā idhar ko ḳhudā kī qasam
dil-e-mushfiq-e-man use khīñch to lā tujhe jazba-e-kāh-rubā kī qasam

maiñ vo āvāra ki bādal bhī ḳhafā haiñ mujh se
tū zamāne ko bhī Thahrā huā lamha jaane

vasl meñ zikr ġhair kā na karo
ḳhush kiyā hai to phir ḳhafā na karo

gumrāh kah ke pahle jo mujh se ḳhafā hue
āḳhir vo mere naqsh-e-qadam par fidā hue

tevar-e-dariyā kā shikva hai na tūfāñ kā gilā
merī parvāreñ ḳhafā thiiñ bādbāñ bad-ḳhvāh thā

hote āzurda ho aane se hamāre jo tum
ḳhush raho mat ho ḳhafā ham chale lo bismillāh