Tags-Khafa

kisī se baat jo kī hai to vo ḳhafā haiñ 'nazīr'
kisī ko dost banāte to aur kyā karte

ḳhafā kījiye ab na 'aḳhtar' ko sāhab
ye dil lījiye aur kyā lījiyegā

ba-majbūrī ba-āḳhir ye mujhe kahnā hī paḌtā hai
bahut pur-fan huī duniyā nigāhoñ ko ḳhafā kar de

yā vo the ḳhafā ham se yā ham haiñ ḳhafā un se
kal un kā zamāna thā aaj apnā zamānā hai

manāne se nahīñ mantā jo koī
hamārā dam ḳhafā hotā hai kyā kyā

ḳhāna-e-dil pe hukūmat hai usī kī 'aḳhtar'
ye alag baat ki vo mujh se ḳhafā rahtā hai

sab kā chehra pas-e-dīvār-e-anā rahtā hai
ā.īne se yahāñ har shaḳhs ḳhafā rahtā hai

sachchā.ī hamdardī yaarī yuuñ ham meñ se chalī ga.ī
jaise ḳhud kirdār ḳhafā ho jaa.eñ kisī kahānī se

duniyā meñ kaun hai jo nahīñ hai mire ḳhilāf
ik tum hī rah ga.e ho tumheñ bhī ḳhafā karūñ

mire raazī ba-razā hone se sab raazī haiñ
varna jo hai vo shikāyat se ḳhafā hotā hai

bazm se uTh to chalā maiñ ki mahal thā lekin
rone vāloñ se bhalā koī ḳhafā hotā hai

ye to vaqt vaqt kī baat hai hameñ un se koī gila nahīñ
vo hoñ aaj ham se ḳhafā ḳhafā kabhū ham se un ko bhī pyaar thā

hai ahrman se na ma.alūm kyuuñ ḳhafā yazdāñ
ġharīb koī kharī baat kah gayā hogā

aisā na ho ki ḳhvāb bhī jhaḌ jaa.eñ niiñd se
mausam yahāñ ho sard pa itnā ḳhafā na ho

koī tahrīr mukammal na huī
mujh se har lafz ḳhafā ho jaise

vo mehrbān nahīñ hai to phir ḳhafā hogā
koī to rābta us ko bahāl rakhnā hai

aap āzurda hue 'hāmid' ḳhafā
lījiye donoñ barābar ho ga.e

koī ham se ḳhafā sā lagtā hai
varna dil kyuuñ bujhā sā lagtā hai

zamāne-bhar ne nazreñ pher lī haiñ
hue ho tum bas ik ham se ḳhafā kyā

ab ke jab us se milo haath dabā kar dekho
ab bhī vo tum se ḳhafā ho ye zarūrī to nahīñ