Tags-Khafa

'shorish' mirī navā se ḳhafā hai faqīh-e-shahr
lekin jo kar rahā huuñ bajā kar rahā huuñ maiñ

tez āñdhī se ḳhafā hai koī
TuuT kar barg girā hai koī

maiñ aap kamar-basta huuñ ab qatl pe apne
bin yaar hai jiine se mirā bas ki ḳhafā jī

diloñ meñ ḳhaar laboñ par gila milegā mujhe
ḳhafā rahegā zamāna to kyā milegā mujhe

kis ḳhushī meñ haa.e kaisā ranj phailā kyā karūñ
kyā ḳhabar thī hañste hañste vo ḳhafā ho jā.egā

koī ḳhush ho ki ḳhafā ho 'hairat'
ham to har baat kharī kahte haiñ

vo kahā adū se hai maiñ ne kyā ki hue haiñ aap jo yuuñ ḳhafā
ye ġhazab ye jhuuT ye iftirā mire sāmne to bulā.iye

kabhī maiñ apne aalam meñ nahīñ huuñ
kabhī raazī kabhī ḳhud se ḳhafā huuñ

dekhtā aur na Thahartā to koī baat bhī thī
jis ne dekhā hī nahīñ us se ḳhafā kyā honā

dam-e-qatl koī jo bol uThā to ḳhajil ho kyā vo ḳhafā huā
use tum ne zab.h abas kiyā ye tumhārā shukr-guzār thā

jā tujh ko koī jism se aage na paḌhegā
ai mujh se ḳhafā merī mohabbat se gurezāñ

vo nādān guḌiyā ḳhafā ho ga.ī
vo roī vo chillā.ī aur so ga.ī

mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

kabhī bolnā vo ḳhafā ḳhafā kabhī baiThnā vo judā judā
vo zamāna naaz o niyāz kā tumheñ yaad ho ki na yaad ho

chīḳheñge ḳhuub ham yahāñ chāhe ḳhafā hoñ mehmāñ
nafrat ho jis ko shor se ghar meñ hamāre aa.e kyoñ

baġhal meñ rashk se dil dil-rubā nahīñ rahtā
ḳhafā hai ye ki tū mujh se ḳhafā nahīñ rahtā

sach batā ishq mujhe saḳht pareshāñ huuñ maiñ
kyuuñ ḳhafā hotā nahīñ dost ḳhatā par merī

ham tark-e-ta.alluq kā gilā bhī nahīñ karte
tum itne ḳhafā ho ki jafā bhī nahīñ karte

ye adā bhī us kī ajiib hai ki baḌhā ke hausla-e-nazar
mujhe izn-e-dīd diyā bhī hai mire dekhne pe ḳhafā bhī hai

duniyā ne kyā nahīñ kiyā ham ne gila nahīñ kiyā
sab se burā.ī lī magar tum ko ḳhafā nahīñ kiyā