Tags-Khafa

koī jis baat se ḳhush hai to ḳhafā dūsrā hai
kuchh bhī kahne meñ kisī se yahī dushvārī hai

kyā lutf rahā is chāhat meñ jo ham chāheñ aur tum ho ḳhafā
ye baat sunī to vo chanchal yuuñ hañs kar bolā dekheñge

kis kis ko batā.eñge judā.ī kā sabab ham
tū mujh se ḳhafā hai to zamāne ke liye aa

ḳhafā kiyā hai ḳhudā ko to bār-hā lekin
ḳhudā kā shukr ḳhafā ḳhilqat-e-ḳhudā nahīñ kī

ajiib dukh hai laboñ par gilā koī bhī na thā
bichhaḌte vaqt kisī se ḳhafā koī bhī na thā

jān-o-dil se bhī guzar jā.eñge
agar aisā hī ḳhafā kījiyegā

kyā ek hī mehvar pe hai Thahrī huī duniyā
vo jab bhī milī hai to ḳhafā ham se milī hai

maiñ ne kahā ki rahte ho har baat par ḳhafā
kahne lage huzūr ye qurbat kī baat hai

bulbuleñ gul se ḳhafā hoñ qumriyāñ shamshād se
sair ho chaliye jo aap ai yaar qaisar-bāġh meñ

koī be-vaj.h kyuuñ ḳhafā hogā
kuchh to us ko burā lagā hogā

sar-e-bāzār hai yāroñ kī talāsh
jo guzartā hai ḳhafā lagtā hai

terī peshānī pe bhī paḌ jā.eñge talḳhī se bal
merī sachchī baat par tū bhī ḳhafā ho jā.egā

ḳhafā na ho to dikhā deñ ham aa.ina tum ko
hameñ qubūl ki saarī ḳhatā hamārī hai

aap ko mujh se ḳhafā mujh se ḳhafā dekhtā huuñ
phūTtī kyuuñ nahīñ āñkheñ mirī kyā dekhtā huuñ

chheḌā hai dast-e-shauq ne mujh se ḳhafā haiñ vo
goyā ki apne dil pe mujhe iḳhtiyār hai

jo ba-zāhir ḳhafā hai ai 'mahtāb'
vo ba-bātin ḳhafā nahīñ mujh se

dil hī dil meñ vo buġhz rakhtā hai
jo ba-zāhir ḳhafā nahīñ mujh se

kabhī vo ḳhush bhī rahā hai kabhī ḳhafā huā hai
ki saarā marhala tai mujh se barmalā huā hai

mehrbāñ jab ho to kartā hai asīrī kā savāl
vo ḳhafā hai jab talak āzād rakkhegā mujhe

shikve ke naam se be-mehr ḳhafā hotā hai
ye bhī mat kah ki jo kahiye to gila hotā hai