Tags-Khafa

tū rahe ham se ḳhafā kitnā hī chāhe lekin
ham magar tujh se to nāshād nahīñ hone ke

bezār fazā darpa-e-āzār sabā hai
yuuñ hai ki har ik hamdam-e-derīna ḳhafā hai

shikan hamesha jabīñ par rahe to aadat hai
mujhe yaqīñ hai vo mujh se kabhī ḳhafā na huā

kivāḌ band bhī hai aur nīm-vā bhī hai
vo ruup anuup zarā ḳhush zarā ḳhafā bhī hai

tabassum ki pīchhe kahīñ kuchh chhupā hai
hameñ sab patā hai tum ham se ḳhafā ho

the ḳhafā tum to hamārā dam-sāz
āfat-e-jāñ koī tum sā hotā

ho kar judā bhī us se 'na.īmī' maiñ jī to luuñ
lekin ye Dar hai is se kahīñ vo ḳhafā na ho

us jān-e-tamannā se be-parda na shikva kar
vo tujh se ḳhafā hai to jiine se ḳhafā ho jā

kabhī ḳhushbū kabhī jugnū kabhī sabza kabhī chāñd
ek tere liye kis kis ko ḳhafā karte haiñ

durust hai ki judā.ī meñ maut aa jaa.e
magar ye kyā ki ḳhafā ho ke zinda rahnā hai

shohrat se terī ḳhush jo bahut hai, ye hai ḳhirad
aur ye jo tujh meñ tujh se ḳhafā hai, ye ishq hai

ajiib shaḳhs hai nārāz ho ke hañstā hai
maiñ chāhtā huuñ ḳhafā ho to vo ḳhafā hī lage

manā bhī lūñgā gale bhī lagā.ūñgā maiñ 'alī'
abhī to dekh rahā huuñ use ḳhafā kar ke

ab vo ḳhafā hue haiñ to yuuñ bhī hai ik ḳhushī
marnā hamāre vāste mushkil nahīñ rahā

ai 'saḳhī' aaj to kuchh ḳhair nahīñ
vo kamar ho ke ḳhafā bāñdhte haiñ

chāñd-nagar se aane vaalī miTTī kañkar rol ke laa.e
dhartī-māñ chup hai jaise kuchh soch rahī ho ḳhafā sī hai

hameñ hai shauq tirā maḳhmalīñ badan pahneñ
ḳhafā hai ham se yuuñ nargis kā nastaran kā libās

go ḳhafā hī huā kare par ham
ik zarā us ko dekh to aaveñ

gardish-e-daurāñ kā ham par bhī asar hotā zarūr
ham ne dekhā hai magar us ko ḳhafā hote hue

jo tum ne pūchhā to harf-e-ulfat bar aayā sāhib hamāre lab se
so is ko sun kar hue ḳhafā tum na kahte the ham isī sabab se