Tags-Khafa

kyuuñ chāhne vāloñ se ḳhafā aap haiñ itne
parvānoñ se yuuñ sham.a ko jalte nahīñ dekhā

ḳhafā hote haiñ ham to ḳhush hote ho tum
jo ḳhush hote ham haiñ to bezār tum ho

saikḌoñ bāteñ kah ke kahte haiñ
phir hameñ kyuuñ ḳhafā kare koī

jo milne aatā hai mil kar judā bhī hotā hai
vo ḳhush-mizāj hai lekin ḳhafā bhī hotā hai

ġham mire saath thā hamesha se
ab ke vo bhī zarā ḳhafā hogā

ḳhafā ho kis pe bhañveñ kyuuñ chaḌhī haiñ ḳhair to hai
ye aap teġh pe dhar kar jilā kidhar ko chale

vo ḳhayāl khol ke dekhnā vo savāl taul ke dekhnā
ki samajh rahe ho jise ḳhafā vo ḳhafā na ho kahīñ yuuñ na ho

kuchh log yūñhī shahr meñ ham se bhī ḳhafā haiñ
har ek se apnī bhī tabī.at nahīñ miltī

faqat tum hī nahīñ nārāz mujh se jān-e-jānāñ
mire andar kā insāñ tak ḳhafā hai intihā hai

diin o dānish donoñ hī har moḌ par the dil ke saath
yak-ba-yak dīvāna donoñ se ḳhafā kyūñkar huā

yuuñ judā hue mere dard-āshnā mujh se
ek se ḳhafā huuñ maiñ dūsrā ḳhafā mujh se

hijāb-e-ruḳh lahak uThā agar bahut ḳhafā huā
jabhī to ham se pai-ba-pai qusūr-e-mudda.ā huā

kaash us se bhī ta.āruf mirā hotā 'nūrī'
jis pe vo pahle-pahal hoñge ḳhafā mere ba.ad

hazār us se ḳhafā hoñ burā kaheñ lekin
'shamīm' shaḳhs thā kyā ḳhuub dam ġhanīmat thā

jaate ho tum jo ruuTh ke jaate haiñ jī se ham
tum kyā ḳhafā ho ḳhud haiñ ḳhafā zindagī se ham

shab iḳhtilāt se vo mire kyā ḳhafā huā
had se ga.ī ziyāda jo añgusht-e-pā sarak

din meñ bhī sochte haiñ ham tujh ko
raat is baat pe ḳhafā hai kuchh

be-zār ho na jaa.e kahīñ zindagī se dil
tāsīr se ḳhafā mire naale hue to haiñ

yā vo the ḳhafā ham se yā ham haiñ ḳhafā un se
kal un kā zamāna thā aaj apnā zamānā hai

mazkūra kal kā jaane do ho jāoge ḳhafā
thamtī nahīñ zabān pe jis vaqt aa.ī baat