Tags-Khat

tirī nok qalam ne dil meñ gahre zaḳhm Daale haiñ
hazāroñ dashna-o-nashtar liye ḳhat kā javāb aayā

khīñch de ḳhat na.ī sub.hoñ ke ufuq-tā-ba-ufuq
ḳhāk-tīro ke muqaddar meñ ujālā likh de

mire ḳhat ko us ne na jab paḌhā mire nāma-bar ko bhī ġham huā
kahā muddatoñ kā jo aasrā thā vo aaj tum ne miTā diyā

hamāre ḳhat ke to purze kiye paḌhā bhī nahīñ
sunā jo tū ne ba-dil vo payām kis kā thā

tumhāre ḳhat meñ nayā ik salām kis kā thā
na thā raqīb to āḳhir vo naam kis kā thā

tilā.ī rañg jānāñ kā agar mazmūn likhūñ ḳhat meñ
to haala gird harfoñ ke bane sone ke paanī kā

sab chūḌiyāñ tumhārī samundar ko sauñp diiñ
aur kar diye havā ke havāle tumhāre ḳhat

parvā mujhe nahīñ hai kisī chāñd kī 'vasī'
zulmat ke dasht meñ haiñ ujāle tumhāre ḳhat

dukh dard meñ hamesha nikāle tumhāre ḳhat
aur mil ga.ī ḳhushī to uchhāle tumhāre ḳhat

ahl-e-hunar ko mujh pe 'vasī' e'tirāz hai
maiñ ne jo apne sher meñ Dhāle tumhāre ḳhat

jaise ho umr bhar kā asāsa ġharīb kā
kuchh is tarah se maiñ ne sambhāle tumhāre ḳhat

yuuñ to haiñ be-shumār vafā kī nishāniyāñ
lekin har ek shai se nirāle tumhāre ḳhat

mere lahū meñ guuñj rahā hai har ek lafz
maiñ ne ragoñ ke dasht meñ paale tumhāre ḳhat

likkhūñgā ḳhat meñ ḳhuub adū kī burā.iyāñ
ho kar ḳhafā vo kuchh na likheñge javāb meñ

uḌtī huī chiñgāriyāñ sone nahīñ detīñ
rūThe hue is ḳhat ko jalānā hī nahīñ thā

aaj us kā maiñ ne āḳhirī ḳhat bhī jalā diyā
'ma.asūm' umr bhar kī kasak ḳhatm ho ga.ī

the ḳhatt-e-shikasta kī ruḳhsār tire ta.alīm
az-bas-ke hujūm un par zulfoñ kī shikan kā thā

ḳhat us ke apne haath kā aatā nahīñ koī
kyā hādsa huā hai batātā nahīñ koī

nahīñ likhte haiñ ḳhat jo ham ko vo qāsid
kisī ke sikhā.e paḌhāye hue haiñ

baat ik aur pas-e-parda-e-alfāz bhī thī
us ne ḳhat merā paḌhā lutf-e-suḳhan kī had tak