Tags-Khat

nā-umīdī maut se kahtī hai apnā kaam kar
aas kahtī hai Thahar ḳhat kā javāb aane ko hai

ḳhat meñ kyā kyā likhūñ yaad aatī hai har baat pe baat
yahī behtar ki uThā rakhkhūñ mulāqāt pe baat

daam se ḳhat ke chhuTā dil to nahīñ ḳhātir jam.a
qaid karne ko abhī zulf-e-pareshāñ to hai

aaj sīvan ko udheḌo to zarā dekheñge
aaj sandūq se vo ḳhat to nikālo yaaro

qāsid ke aate aate ḳhat ik aur likh rakhūñ
maiñ jāntā huuñ jo vo likheñge javāb meñ

shagufta gaal tīkhe ḳhat kā mausam
dobāra naḳhl-e-paikar tak na pahuñchā

aane se tere ḳhat ke ye kyuuñ dil-e-girafta hai
batlā ki terī zulf-e-pareshāñ ko kyā huā

yāqūt-e-lab tirā huā kyuuñ ḳhat se jurm-vār
zālim ye rashk-e-la.al-e-badaḳhshāñ ko kyā huā

tirī raah dekhūñ maiñ tā-kujā kahūñ kis se ye ki ḳhabar hī lā
mirā us se le ke javāb-e-ḳhat kahīñ jald uḌ ke kabūtar aa

sakī ke kuch pe nāzuk ḳhat na būjhe koī kine likhyā
'qutub' kuuñ pūchhe tū yuuñ ke likhyā hai merā nak misrā

sakī mukh safhe par tere likhyā rāqim malak misrā
ḳhafī ḳhat suuñ likhyā nāzuk tire donoñ palak misrā

husn thā terā bahut ālam-fareb
ḳhat ke aane par bhī ik aalam rahā

aaj kā ḳhat hī use bhejā hai korā lekin
aaj kā ḳhat hī adhūrā nahīñ likhkhā maiñ ne

kāmrāñ hone kā ushshāq ko dete haiñ payām
ye ḳhat-o-ḳhāl jo kohre se ubhar aa.e haiñ

ḳhat aa.e pe bhī din hai siyah tum se hamārā
jaatā nahīñ andher ye sarkār se ab tak

ḳhat kī ruḳhsār par syāhī hai
chashm-e-ḳhvābīda ḳhush-nigāhī hai

kahā us ne hamārā ḳhat chhupā kar
jo aatā to kidhar jaatā kahāñ hai