Tags-Khizan

kyā hotā hai ḳhizāñ bahār ke aane jaane se
sab mausam haiñ dil khilne aur dil murjhāne se

aisā vīrān huā hai ki ḳhizāñ rotī hai
kal bahut shor thā jis baaġh meñ gul-kārī kā

kabhī to sehn-e-gulistāñ se ho ḳhizāñ ruḳhsat
kabhī to peḌ pe pattā harā dikhā.ī de

kyā ye sach hai ki ḳhizāñ meñ bhī chaman khilte haiñ
mere dāman meñ lahū hai to mahaktā kyā hai

is jahāñ se ḳhizāñ kā daur gayā
lahlahāte chaman kī baat kareñ

ḳhizāñ ke dast-e-sitam ne mujhe chhuā hai magar
tamām sho.ala o shabnam huuñ kāshmar kī tarah

agar dekheñ bahār-e-husn khil gul ke naman phūleñ
rahīñ haiñ muñd jaddā.ī ye ḳhizāñ siiñ juuñ kalī añkhiyāñ

yaad hai zamzama-e-sāz-e-bahār
shor-e-āvāz-e-ḳhizāñ yaad nahīñ

masarrateñ rāzdār-e-ġham thiiñ masarratoñ meñ alam thā pinhāñ
jabhī to sehn-e-chaman meñ shāyad bahār aa.ī ḳhizāñ se pahle

ho ḳhizāñ kyūñ-kar na gulshan kī bahār
jab yahāñ bād-e-sabā sar-sar chale

ḳhizāñ ke din kisī piile pahāḌ jaise din
shaguft gul tirī ummīd par guzārā kareñ

jaatī hī nahīñ dil se tirī yaad kī ḳhushbū
maiñ daur-e-ḳhizāñ meñ bhī mahaktā hī rahā huuñ

mire chaman meñ ḳhizāñ rakh chukī qadam lekin
mire ḳhayāl ko miltī bahār kam-az-kam

shagufta rahtī hai ḳhātir hamesha
qanā.at bhī bahār-e-be-ḳhizāñ hai

bāġh-e-ālam kī bahāreñ sab ḳhizāñ-anjām haiñ
aish-sāmānī ko vaj.h-e-ḳhastagī-e-dil samajh

chaman ke phūloñ meñ ḳhuun dene kī ek tahrīk chal rahī hai
aur is lahū se ḳhizāñ kī ḳhātir ḳhizāb tayyār ho rahā hai

munāfiqat kā nisāb paḌh kar mohabbatoñ kī kitāb likhnā
bahut kaThin hai ḳhizāñ ke māthe pe dāstān-e-gulāb likhnā

kyā din the jab nazar meñ ḳhizāñ bhī bahār thī
yuuñ apnā ghar bahār meñ vīrāñ na thā kabhī

daur-e-ḳhizāñ meñ yuuñ mire dil ko qarār hai
maiñ jaise āshnā-e-bahārāñ na thā kabhī

zulmat-e-shām-e-ḳhizāñ yaad karegī barsoñ
ham jab aa.e haiñ gulistāñ-ba-kanār aa.e haiñ