Tags-Khizan

huuñ bū-e-gul ḳhizāñ-gazīda
koī jise DhūñDe bhī na paa.e

ab yaad kabhī aa.e to ā.īne se pūchho
'mahbūb-ḳhizāñ' shaam ko ghar kyuuñ nahīñ jaate

barg-e-ḳhizāñ-rasīda banāyā hai ishq ne
maiñ mausam-e-bahār meñ bustāñ se duur huuñ

chāroñ taraf haiñ sabz salāḳheñ bahār kī
jin meñ ghirā huā koī mausam ḳhizāñ kā hai

siyāh darzoñ meñ ghaas ke zard nīm-jāñ phuul hañs rahe haiñ
maiñ apnī vīrāñ ḳhizāñ-zada zindagī se begāna ho gayā huuñ

dasht-e-alam meñ barg-e-ḳhizāñ-dīda kī tarah
bas ai hujūm-e-shauq kahīñ ham bikhar na jaa.eñ

rahegā yuuñ laboñ par shikva-e-jaur-e-ḳhizāñ kab tak
satā.egā bhalā nāzuk diloñ ko ye jahāñ kab tak

ḳhizāñ ke chāñd ne pūchhā ye jhuk ke khiḌkī meñ
kabhī charāġh bhī jaltā hai is havelī meñ

tum se sach pūchho to itnī hai guzārish merī
apne 'afsar' ko ḳhizāñ meñ bhī ġhazal-ḳhvāñ rakhnā

mirī ḳhuddār 'fitrat' kī ḳhudā hī aabrū rakkhe
ḳhizāñ ke daur meñ azm-e-bahārāñ le ke chaltā huuñ

dushman kī dostī hai ab ahl-e-vatan ke saath
hai ab ḳhizāñ chaman meñ na.e pairahan ke saath

udaas rut hai abhī tak mire ta.āqub meñ
ḳhizāñ ke phuul khile haiñ bahār se bāhar

kyā navā-sanjī kareñ ai ham-safīrān-e-chaman
aa ga.ī fasl-e-ḳhizāñ gulshan se saare khiske phuul

tere andar kī ḳhizāñ māyūs kar degī tujhe
khiḌkiyoñ meñ phuul rakh dīvār par sabza lagā

ḳhizāñ se pahle yahāñ kā ajiib mausam thā
samar kī tarah parinde shajar meñ rahte the

gulsitāñ meñ ḳhizāñ bhī aa.egī
phuul aur paat bhuul jaate haiñ

bhareñ sard aaheñ jo garm aah bhar ke
nasīm aa.ī bād-e-ḳhizāñ chalte chalte

tirī chaal bād-e-ḳhizāñ ne uḌaa.ī
ujāḌā mirā āshiyāñ chalte chalte

ye e.atibār-e-gul-o-gulsitāñ mujhī se hai
ye aur baat ki parvarda-e-ḳhizāñ huuñ maiñ

maiñ ḳhizāñ kī shaam huuñ
rut bahār kī hai tū