Tags-Khizan

bahār de na sakī ek phuul ko bhī nikhār
ḳhizāñ ke saath hai rañg-e-bahār kyā hogā

nāzāñ hai jo apnī qismat par gulchīñ ko ye kyā ma.alūm nahīñ
jā.egī bahār aa.egī ḳhizāñ badlegā zamāna phūloñ kā

ayyām-e-ḳhizāñ meñ ahl-e-chaman sarsar ko sitam se kyā rokeñ
begāna huā jab sabza bhī to kaun yagāna phūloñ kā

ayyām-e-ḳhizāñ meñ ai bulbul taklīf bahut baḌh jā.egī
phūloñ kī qasam detā huuñ tujhe chheḌ ab na tarāna phūloñ kā

be-ḳhizāñ hai tasavvur-e-hastī
maiñ abhī ālam-e-bahār meñ huuñ

kaT rahī hai aur kaT chuktī nahīñ fasl-e-ḳhizāñ
tez-tar ik aur teġh-e-nau-bahārāñ chāhiye

sun qatār andar qatār ashjār kī sargoshiyāñ
aur kahānī paḌh ḳhizāñ ne raat jo tahrīr kī

daur-e-ḳhizāñ gayā na gayā is se kyā ġharaz
manzar jamā liye haiñ nazar meñ bahār ke

vīrāniyāñ tanhā.iyāñ mausam hai ḳhizāñ kā
anvār karo dil kī havelī to batā.ūñ

thī na ḳhizāñ kī rok-thām dāman-e-iḳhtiyār meñ
ham ne bharī bahār meñ apnā chaman luTā diyā

ḳhizāñ ke vaar se ghabrā ke ai 'jamīl' kabhī
shaguft-e-gul ke liye iltimās mat karnā

bahār-e-gul se ab daur-e-ḳhizāñ tak
kahāñ se baat aa pahuñchī kahāñ tak

maiñ aaj gulsitāñ meñ bulā luuñ bahār ko
lekin ye chāhtā huuñ ḳhizāñ ruuTh kar na jaa.e

tū samajhtā hai to ḳhud terī nazar gahrī nahīñ
varna buniyād-e-ḳhizāñ ai be-ḳhabar gahrī nahīñ

har taraf hai ayaañ ruḳh-e-dil-dār
hai ḳhizāñ nau-bahār ā.ankhoñ meñ

'sahar' is jahān-e-bahār-e-ḳhizāñ meñ
ḳhushī dā.imī hai na ġham jāvedānī

ḳhizāñ kā daur bhī aatā hai ek din 'kaifī'
sadā-bahār kahāñ tak daraḳht rahte haiñ

'joshish' gul-e-mazmūn-e-chaman tab.a kā tere
dekhe na kabhī tā-ba-abad rū-e-ḳhizāñ ko

ḳhizāñ kā zikr to merī zabāñ pe thā hī nahīñ
bahār kartī hai mātam tire havāle se

kuchh shikasta sā hai rañgīnī-o-nik.hat kā tilism
yahī bedād-e-ḳhizāñ hai to ḳhizāñ aur sahī