Tags-Khizan

savād-e-shām-e-ḳhizāñ hai to ho hameñ kyā ġham
nazar meñ sub.h-e-chaman ke sivā kuchh aur nahīñ

dil laraztā hai to Darte haiñ kahīñ TuuT na jaa.e
shāḳh par ek hī to barg-e-ḳhizāñ rakhte haiñ

ḳhizāñ tamām huī kis hisāb meñ likhiye
bahār-e-gul meñ jo pahuñche haiñ shāḳh-e-gul ko gazand

merī ḳhizāñ to sabz huī is ḳhumār meñ
aane kā us ne va.ada kiyā hai bahār meñ

tamām umr tire intizār meñ hamdam
ḳhizāñ-rasīda rahā huuñ bahār kar mujh ko

tafraqa bād-e-ḳhizāñ ne ye chaman meñ Daalā
gul kahīñ aur paḌā hai to samar aur kahīñ

vo aur chiiz hai hote haiñ jis se dil shādāb
tirī bahār se vīrānī-e-ḳhizāñ na ga.ī

safed phuul mile shāḳh-e-sīm-bar ke mujhe
ḳhizāñ ko kuchh na milā be-libās kar ke mujhe

maiñ ḳhizāñ meñ bhī parastār rahā huuñ us kā
mausam-e-gul meñ chaman-zār ko kaise chhoḌūñ

havā ke zaḳhm khule the udaas chehre par
ḳhizāñ ke shahar se koTī to pur-bahār gayā

mujhe haqīqat se vāsta hai naqīb-e-fitrat huuñ maiñ azal se
ḳhizāñ ko fasl-e-bahār kah duuñ ye merā zarf-e-nazar nahīñ hai

alam bhī kab saath chhoḌ jaa.e kisī ko us kī ḳhabar nahīñ hai
bahār to phir bahār Thahrī ḳhizāñ bhī ab mo'atabar nahīñ hai

shabāb kar diyā merā tabāh ulfat ne
ḳhizāñ ke haath kī boī huī bahār huuñ maiñ

bulā rahā hai mujhe phir kisī badan kā basant
guzar na jaa.e ye rut bhī kabhī ḳhizāñ kī tarah

nishāñ ashk-e-ḳhūnīñ ke uḌte chale haiñ
ḳhizāñ ho chalī hai bahār-e-garebāñ

hai ḳhizāñ mausam-e-afsurda-nigāhī kā naam
bujh gayā shauq to har shāḳh jhulas jā.egī

bahār to bahār thī ḳhizāñ bhī ab bahār hai
nizām-e-gulsitāñ mizāj-e-bāġhbāñ badal gayā

ta.āruf mirā koī mushkil nahīñ
maiñ 'āshufta' chañgezī ibn-e-ḳhizāñ

koī ġhul huā thā na shor-e-ḳhizāñ
ujaḌne lagīñ ḳhud-ba-ḳhud bastiyāñ