Tags-Khizan

'az.har' tirā nasīb hai ye shabnamī bahār
chehre pe tū bhī rañg-e-ḳhizāñ mal ke dekh le

use kaho ġham-e-tārāji-e-chaman ho use
had bahār o ḳhizāñ se guzar ga.e ham tum

mujh sā bhī koī ishq meñ hai bad-gumāñ nahīñ
kyā rashk dekh kar mujhe rañg-e-ḳhizāñ nahīñ

machā hai shor ḳhizāñ kā hai ruḳh usī jānib
agar ye sach hai to samjho ki ham bhī ab ke ga.e

ho gayā zard paḌī jis pe hasīnoñ kī nazar
ye ajab gul haiñ ki tāsīr-e-ḳhizāñ rakhte haiñ

allāh re intizār-e-bahārāñ kī lazzateñ
guzrī hai yuuñ ḳhizāñ bhī ki din hoñ bahār ke

maiñ ḳhud ko chakh nahīñ paatā ki toḌ letī hai
mujhe havā-e-ḳhizāñ jab bhī pakne lagtā huuñ

koī jā kar ḳhizāñ se kah aa.e
phuul gulshan meñ phir nikharte haiñ

bahār ban ke ḳhizāñ ko na yuuñ dilāsā de
nigāheñ pher le apnī na ḳhud ko dhokā de

unheñ nasīb ho ab māvarā koī saa.at
azal se peḌ bahār-o-ḳhizāñ kī zad meñ haiñ

ḳhizāñ to kyā nahīñ jis kī bahār ko bhī ḳhabar
ik aise baaġh ke andar hai barg-o-bār mirā

chand gumnām sī yādoñ kī mahak hai dil meñ
is ḳharābe meñ ye gul-hā-e-ḳhizāñ rahne de

dekh ujḌe hue manzar abhī dil-soz nahīñ
aur kuchh roz yūñhī rañg-e-ḳhizāñ rahne de

azbar karā diyā hai ḳhizāñ ko nisāb-e-gul
sarsar ko dars de ke sabā kar diyā gayā

usī kī ḳhātir ḳhizāñ-zada dil ne jāma-e-chāk apnā badlā
ki jashn-e-jamhūr inqilāb-e-chaman kā ā.īna-dār aa.e

jab aa.ī ḳhizāñ ham ko kahā ''bāġh chalo ho''
pūchhā na kabhī sair o tamāshā ke dinoñ meñ

firāqe-e-gul se jo nāla-kash hai qafas meñ bulbul shahīd-e-jalva
bahār-e-gulshan ḳhizāñ-numā hai junūñ-zada abr-e-bahmanī hai

ba-rañg-e-husn-e-butāñ hai dil-e-shagufta mirā
jo is chaman meñ ḳhizāñ ho to phir bahār na ho

kuchh is qadar hai ġham-e-zindagī se dil māyūs
ḳhizāñ ga.ī to bahāroñ meñ jī nahīñ lagtā

ḳhizāñ-rasīda chaman meñ bhī jhūltī ho bahār
guloñ se rañg kalī se mahak judā na lage