Tags-Khizan

jab ki be-rañg rahe baaġh bahāroñ meñ 'shahāb'
tere jañgal meñ khile phuul ḳhizāñ hote hue

Thahre hue haiñ barg-e-ḳhizāñ-dīda kī tarah
sankī havā zarā bhī to samjho ki ham ga.e

na makāñ aaj hai sābit na zamāñ hai sayyār
na ḳhizāñ sho.abada-ārā na bahār aaj kī raat

dekh phūloñ se lade dhuup nahā.e hue peḌ
hañs ke kahte haiñ guzārī hai ḳhizāñ bhī ham ne

maiñ tirā mausam-e-ḳhizāñ pahnūñ
aur fasl-e-bahār ho jā.ūñ

har tarah ham dil-e-nā-fahm ko samjhā leñge
daaġh maujūd haiñ phūloñ ko ḳhizāñ hone do

ḳhizāñ meñ ahl-e-nasheman kā haal to dekhā
qafas nasīb pe kyā guzrī hai ḳhudā jaane

tasvīr-e-ḳhizāñ lahū meñ ab ke
piilī piilī harī harī hai

baaġh meñ gulchīñ hai na hai maalī bijlī hai na falak pe sahāb
ahd-e-ḳhizāñ meñ jalā hai nasheman aa ke kahāñ se phuul paḌā

sune hai maiñ ne fuġhān-e-bulbul bahār meñ hai mujhe ta.ammul
chaTak rahā hai jo ġhuncha-e-gul sadā-e-naqqāra-e-ḳhizāñ hai

ho ek gulshan ḳhizāñ-rasīda to kaam aa.e lahū hamārā
tamām aalam meñ tīrgī hai kahāñ kahāñ mish.aleñ jalā.eñ

ḳhizāñ ke hosh kisī roz maiñ uḌātā huā
tumheñ dikhūñgā yaqīnan bahār laatā huā

duur jab se sifat-e-barg-e-ḳhizāñ-dīda hai
yaad aatā hai shab-o-roz vo gulshan kaisā

ḳhizāñ ne satāyā na ḳhāroñ ne luuTā
guloñ ne diye dukh bahāroñ ne luuTā

ḳhizāñ kā vasvasa hai fasl-e-gul meñ
zarūrat hai bahār-e-be-ḳhizāñ kī

fasl-e-gul sab kī nazar meñ hai magar mere liye
ik ḳhizāñ meñ ālam-e-gulzār hai tere baġhair

ḳhizāñ kā zikr kyā vo daur thā nā-sāz-gārī kā
bahār aa.ī hai ab ahl-e-chaman kī āzmā.ish hai

sochtā huuñ ki mohabbat hai javānī kī ḳhizāñ
us ne dekhā nahīñ duniyā meñ bahāroñ ke sivā

har ḳhizāñ kī kokh se hotī hai paidā nau-bahār
dāman-e-ummīd mailā aur na dil nāshād kar

kaliyāñ udaas phuul fasurda sabā ḳhamosh
ab ke chaman pe rañg-e-ḳhizāñ der tak rahā