Tags-Khizan

qafas meñ mausamoñ kā koī andāza nahīñ hotā
ḳhudā jaane bahār aa.ī chaman meñ yā ḳhizāñ aa.ī

ḳhizāñ meñ dekh lenā vādī-e-pur-ḳhār se bad-tar
chaman bhī hai bahār-e-lāla-o-nasrīn-o-sosan tak

ḳhizāñ se kaun sī shai chhīn lī bahāroñ ne
guloñ ko aañkh dikhā.ī chaman meñ ḳhāroñ ne

ā.eñge vaqt-e-ḳhizāñ chhoḌ de aa.ī hai bahār
le le sayyād qasam rakh de gulistāñ sar par

aa ga.ī raas mire dil kī udāsī shāyad
itnī muddat bhī kahīñ daur-e-ḳhizāñ rahtā hai

ḳhizāñ kā raaz jo āñkhoñ pe munkashif ho jaa.e
to zard rut bhī bahāroñ kā kaam kartī hai

mirā vaqt mujh se bichhaḌ gayā mirā rañg-rūp bigaḌ gayā
jo ḳhizāñ se baaġh ujaḌ gayā maiñ usī kī fasl-e-bahār huuñ

ḳhizāñ-rasīda daraḳhtoñ ke jism chhalnī haiñ
havā-e-shahr ne kī haiñ sharārteñ kaisī

sub.h kī shart pe manzūr haiñ rāteñ ham ko
phuul khilte hoñ to kuchh roz ḳhizāñ aur sahī

tire aate hī sab duniyā javāñ mālūm hotī hai
ḳhizāñ rashk-e-bahār-e-jāvedāñ mālūm hotī hai

roz sunte haiñ ham ḳhizāñ meñ aah
bulbuloñ se bahār kī fariyād

jo peḌ phal nahīñ dete vo kāTte jaao
ḳhizāñ kā zahr yūñhī gulistāñ se niklegā

usī pe sabr hai mujh ko har ek daur yahāñ
bahār aane se pahle ḳhizāñ se guzrā hai

rañg-e-ḳhizāñ bhī jis kā hai rashk-e-bahār-e-abr
vo kisht za.afarāñ kī hamāre vatan meñ hai

qafas meñ rah ke mujhe ye bhī imtiyāz nahīñ
kise ḳhizāñ kise fasl-e-bahār kahte haiñ

jafā-e-yār ko ham lutf-e-yār kahte haiñ
ḳhizāñ ko apnī zabāñ meñ bahār kahte haiñ

ye zābta hai kahūñ dasht ko gulistāñ-zār
ḳhizāñ ke ruup ko likkhūñ faroġh-e-husn-e-bahār

kyā sabab hai ki ek mausam meñ
kuchh ḳhizāñ meñ haiñ kuchh bahār meñ haiñ

mujhe shabāb ne maarā balā-e-jāñ ho kar
bahār aa.ī mire baaġh meñ ḳhizāñ kī tarah

guloñ ne jab ilzām rakkhā ḳhizāñ par
to vo ḳhaar ko dekh kar muskurā dī