Tags-Khizan

ḳhizāñ tanhā na sair-e-bostāñ ko jā bigāḌ aa.ī
sabā bhī chal ke vaañ ai bulbulo phūloñ ko jhaaḌ aa.ī

huā shikār siyāsat kā ab ke mausam bhī
bahār aa.ī hai lekin ḳhizāñ ko saath liye

ḳhizāñ kā qarz to ik ik daraḳht par hai yahāñ
ye aur baat ki har shāḳh bār-var hai yahāñ

us peḌ ko ghamanD bahut thā bahār meñ
lekin ḳhizāñ meñ vo bhī nigūñ mujh ko mil gayā

ḳhizāñ ke be-kaif daur kā bhī mire garebāñ ye kuchh to haq hai
junūñ ko āḳhir banā.e rakkhūñ niyāz-mand-e-bahār kab tak

tamām umr tire intizār meñ hamdam
ḳhizāñ-rasīda rahā huuñ bahār kar mujh ko

gul kuuñ ai shoḳh mukh tanik dikhlā
ki ḳhizāñ kar dikhā de us kuuñ bahār

kunj-e-qafas hī jis kā muqaddar huā 'jamīl'
us kī nazar meñ daur-e-ḳhizāñ kyā bahār kyā

bahāreñ gulsitāñ kī raas jab ham ko na aa.ī thiiñ
ḳhizāñ se dil kā bahlānā na tum bhūle na ham bhūle

ḳhayāl hai ḳhizāñ meñ bhī mujhe usī bahār kā
ġhazab hai chhoḌtā nahīñ fareb intizār kā

na tujh ko mast-e-havā-e-gulshan ḳhizāñ meñ ai andalīb dekhā
nahīñ tū shaidā.ī bāġh-o-gul kā magar fidā.ī hai rañg-o-bū kā

ik aisā zaḳhm ki jis par ḳhizāñ kā saaya na thā
ik aisā pal ki jo har haal meñ Thaharnā thā

yahī bahut hai ḳhizāñ ko ḳhizāñ jo kahte haiñ
kuchh aise phuul hameñ zeb-e-gulsitāñ to mile

koī fazā koī mausam ho ham se ho mansūb
bahār agar nahīñ miltī hameñ ḳhizāñ to mile

chaman par ek din fasl-e-ḳhizāñ kā raaj bhī hogā
abas hai dil meñ armān-e-bahār-e-jāvedāñ rakhnā

zarā sā bhī mujhe ḳhauf-e-ḳhizāñ nahīñ 'shāhid'
mahak rahe haiñ abhī gul-kade mohabbat ke

ab ke ḳhizāñ aisī Thahrī vo saare zamāne bhuul ga.e
jab mausam-e-gul har phere meñ aa aa ke dobārā guzre thā

ye apnā apnā muqaddar hai aur kyā kahiye
ḳhizāñ nasīb koī hai koī bahār nasīb

ḳhizāñ kā ḳhauf bhī hai mausam-e-bahār bhī hai
kabhī tumhārā kabhī apnā intizār bhī hai

ham ḳhizāñ kī ġhudūd se chal kar
ḳhud december kī kokh tak aa.e