Tags-Khizan

ye bahār-o-ḳhizāñ ke afsāne
log bhī kis qadar haiñ dīvāne

bahāreñ hī huā kartī haiñ tamhīd-e-ḳhizāñ aksar
vahāñ barsoñ rahā mātam jahāñ pal bhar ḳhushī aa.ī

ḳhizāñ kā ḳhauf mujhe khaa.e jā rahā hai 'kamāl'
chīnār surḳh na hoñ ātish-e-suḳhan kī tarah

ḳhizāñ ne phuul ko patthar ne aa.ine ko chunā
hamesha ham ne magar ek dūsre ko chunā

kuchh is adā se chale bād-e-barg-rez ḳhizāñ
ki duur tak saf-e-ashjār be-samar ho jaa.e

vo log jo ki ma.āl-e-chaman se vāqif haiñ
ḳhizāñ-nasīb guloñ kī bahār kyā dekheñ

ḳhizāñ-rasīdoñ ko bāġh-o-bahār se kyā kaam
na ab vo josh-e-tabī.at na valvala dil kā

uruuj par hai chaman meñ bahār kā mausam
safar shurū ḳhizāñ kā yahāñ se hotā hai

ham nahīñ jānte ḳhizāñ kyā hai
kushtagān-e-shabāb haiñ ham log

bahār ho ki ḳhizāñ kār-gāh-e-hastī meñ
unheñ kisī se ġharaz kyā jo tere ho jaa.eñ

idhar ye kaan haiñ qahr-e-ḳhizāñ jo sunte haiñ
udhar vo peḌ hai sehr-e-numū jo boltā hai

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

bahār o ḳhizāñ kam-nigāhoñ ke vahm
bure yā bhale sab zamāne tire

chhā.ī hai 'gulzār' meñ fasl-e-ḳhizāñ
phuul haiñ sab gul shamā.il ke qarīb

ḳhizāñ kī vo sard raat bhī maiñ ne ghar se bāhar guzār dī thī
ki mere bistar pe laash ban kar mirā hī saaya paḌā huā thā

vo mujh ko aazmā ke kaḌī dhuup meñ rahā
mujh ko ḳhizāñ bahār lagī imtihān kī

dam-e-ta.amīr taḳhrīb-e-jahāñ kuchh aur kahtī hai
kalī kuchh aur kahtī hai ḳhizāñ kuchh aur kahtī hai

ronā mujhe ḳhizāñ kā nahīñ kuchh magar 'shamīm'
is kā gila hai aa.ī chaman meñ bahār kyuuñ

koī to aa.e ḳhizāñ meñ patte ugāne vaalā
guloñ kī ḳhushbū ko qaid karnā koī to sīkhe

ḳhizāñ kī shaam ko zaḳhm-e-bahār kis ne kiyā
har ek resha-e-gul rañg-bār kis ne kiyā