Tags-Khizan

ham ajiib tarz ke log the ki hamāre aur hī rog the
maiñ ḳhizāñ meñ us kā thā muntazir use intizār-e-bahār thā

baras kar khul gayā abr-e-ḳhizāñ āhista āhista
havā meñ saañs lete haiñ makāñ āhista āhista

ḳhizāñ-nasīb hai duniyā use ḳhabar kyā hai
bahār le ke jo baiThā bahār le ke uThā

jab havā baaġh se kahtī hai ḳhizāñ aa.ī hai
bāġhbāñ phuul liye haat meñ mar jaate haiñ

jo sair karnī hai kar le ki jab ḳhizāñ aa.ī
na gul rahegā chaman meñ na ḳhaar Thahregā

maiñ ḳhizāñ meñ giraftār huuñ
dekho ḳhvābīda maujoñ ḳharīdār rūhoñ

vo phuul huuñ jo khilā ho ḳhizāñ ke mausam meñ
tamām umr mujhe hasrat-e-bahār rahī

na vo ḳhizāñ rahī baaqī na vo bahār rahī
rahī to merī kahānī hī yādgār rahī

ḳhizāñ-rasīda ye ġhunche ye ḳhār-o-ḳhas yā sumūm
chaman ko muzda-e-fasl-e-bahār bhī deñge

noch liye har shāḳh se patte buuTā buuTā luuT liyā
dast-e-ḳhizāñ ne chorī chorī bāġh-e-tamannā luuT liyā

afsurdagī bhī husn hai tābindagī bhī husn
ham ko ḳhizāñ ne tum ko sañvārā bahār ne

ḳhizāñ kī raat ke qātil kahāñ ga.e dekheñ
ki jo lahū hai charāġh-e-bahār kī lau hai

mire junūñ meñ mirī vafā meñ ḳhulūs kī jab kamī milegī
chaman giraft-e-ḳhizāñ meñ hogā bahār ujḌī huī milegī

ye ahl-e-vahshat kā hausla hai ḳhizāñ pe qabza hai fasl-e-gul kā
vo baḌh ke sīna-sipar hue haiñ gumān-e-barq-o-sharar se pahle

ḳhizāñ meñ kis ne bahāroñ kī dilkashī bhar dī
duā.eñ detā hai dāman kā taar taar kise

phuul afsurda bulbuleñ ḳhāmosh
fasl gul aa.ī hai ḳhizāñ-bar-dosh

ḳhizāñ ke be-kaif manzaroñ kā ba-rañg-e-ḳhushbū javāb rakhnā
kisī kī yaad kā apne dil meñ koī mahaktā gulāb rakhnā

bahāroñ se ḳhizāñ tak yūñhī sair-e-gulistāñ kar ke
rafū karte rahe ham jeb-o-dastāñ dhajjiyāñ kar ke

'qalaq' be-raunaqī raunaq hai merī
bahār-e-umr-e-hastī kī ḳhizāñ huuñ

phuul ke rañg sar-e-shāḳh-e-ḳhizāñ bhī chamke
qaidī-e-rasm-e-chaman ḳhaak ke jauhar na hue