Tags-Khizan

bīm-e-ḳhizāñ se kis ko mafar thā magar nasīm
karte rahe guloñ se nikharne kī baat ham

ḳhizāñ aur naġhme shādī ke bahār aa.e to gā lenā
ye din to ai anādil haiñ tumhāre shor-o-shevan ke

jabhī 'shād' shā.er ko kahte haiñ jhūTā
ḳhizāñ meñ bhī maiñ sher-e-tar kah rahā huuñ

chal basī fasl-e-ḳhizāñ mausam-e-gul aa pahuñchā
le mubārak ho havā bulbul-e-gulzār phirī

chalī hai chhoḌ kar tū kyuuñ bahār-e-gulistāñ mujh ko
ḳhudā jaane kahāñ le jaa.e ab bād-e-ḳhizāñ mujh ko

ḳhizāñ meñ suukh gayā maiñ to ye muqaddar thā
vo naunihāl kahāñ hai jo mere andar thā

jab bhī lahū meñ rañg-e-ḳhizāñ kī saḳhtī baḌhne lag jaatī hai
chand lab o ruḳhsār bulā kar jashn-e-bahārī kar lete haiñ

ḳhizāñ kā zahr sarāyat huā hai rag rag meñ
gulāb-chehre hue zard gulsitānoñ ke

hai kyā ḳhizāñ meñ mumkin sahrā meñ baaġh nikle
zulmat ko jo miTā.e aisā charāġh nikle

vahī bahār o ḳhizāñ hai mujh meñ bhī
mujh se bāhar bhī

is ko ḳhizāñ ke daur meñ bāġhī samajh ke chuum
jo bhī shajar pe āḳhirī pattā dikhā.ī de

chupke chupke ḳhizāñ aa ga.ī baaġh meñ
peḌ paudoñ pe zardī chhiḌakne lagī

pahle ḳhizāñ ke chāk-garebāñ ko dekh lo
phir dāman-e-bahār kī jānib nazar karo

ham haiñ aur fasl-e-ḳhizāñ fasl-e-ḳhizāñ hai aur ham
ham se kyā pūchhte ho fasl-e-ḳhizāñ ke aage

talāsh hai mujhe ab to unhīñ fazāoñ kī
jahāñ ḳhizāñ meñ bhī akasr gulāb aate haiñ

har ek shāḳh ke hāthoñ meñ phuul mahkeñge
ḳhizāñ kā peḌ bhī kapḌe badalnā chāhtā hai

na to sayyād kā khaTkā na ḳhizāñ kā dhaḌkā
ham ko vo chain qafas meñ hai ki bustāñ meñ nahīñ

mausam-e-gul thā ki thī barq-e-ḳhizāñ zer-e-naqāb
phuul hañsne bhī na paa.e the gulistāñ jal gayā

ga.e vo din jab ki is chaman meñ havā-e-nashv-o-numā thī ham ko
ḳhizāñ ko dekhā nahīñ hai ham ne ki ḳhvāhish-e-rañg-o-bū kareñge