Tags-Khizan

fasl-e-ḳhizāñ meñ gul kā to aanā muhāl hai
bijlī hī kaash aa.e mirī āshiyāñ talak

zi-bas āñkhoñ meñ rañgat chhā rahī hai lāla-o-gul kī
ḳhizāñ meñ lutf aatā hai hameñ fasl-e-bahārī kā

ḳhizāñ ke dosh pe hai fasl-e-gul kā raḳht abhī
ki barg-o-bār se ḳhālī hai har daraḳht abhī

yaad ham aa na sake jashn-e-bahārāñ meñ use
ham-safar jis ne hameñ ahd-e-ḳhizāñ meñ rakkhā

bahār kī savāriyoñ ke ham-rikāb kyuuñ rahe
ḳhizāñ kā barg-o-bār par itaab dekhtā huuñ maiñ

na vo tā.eroñ kā jamghaT na vo shāKٓH-e-āshiyāna
tum ise ḳhizāñ kahoge ki bahār kā zamāna

ek tabassum dekh ke tere hoñToñ par
phuul ḳhizāñ kī rut meñ khilne lagte haiñ

ham-safīrān-e-chaman tum ko mubārak ho bahār
ham asīroñ ke muqaddar meñ ḳhizāñ hai ab bhī

aa.ī ḳhizāñ chaman meñ ga.e din bahār ke
sharminda sab daraḳht haiñ kapḌe utaar ke

bichhaḌ ke tum se ḳhizāñ ho ga.e to ye jaanā
hamāre husn meñ sab dilkashī tumhārī thī

ye bahār-o-ḳhizāñ ye ḳhushī aur ġham ye hasīñ nāznīñ dil ke patthar sanam
sab sahāre haiñ bas chaar din ke liye zindagī-bhar kā koī sahārā nahīñ

surāġh-e-mausam-e-gul ke amiin kī sūrat
khile hue haiñ ḳhizāñ meñ bhī zaḳhm-e-sar mere

sub.h-e-bahār-o-shām-e-ḳhizāñ kuchh na kuchh to ho
be-nām zindagī kā nishāñ kuchh na kuchh to ho

jab ḳhizāñ ke chehre piile ho ga.e
baaġh ke sab phal rasīle ho ga.e

jāñ-ba-lab haiñ jo ḳhizāñ meñ ashjār
zard pattoñ kī havā kījiyegā

ḳhizāñ ke ḳhushk pattoñ ko na chheḌo
thake-māñde musāfir so rahe haiñ

mujhe ab ye lag rahā hai vo ḳhizāñ thī Thiik 'rahbar'
ye bahār kaise kaise na.e gul khilā rahī hai

ḳhizāñ-mizāj hai vo chhoḌ do use 'ḳhāvar'
vo mausamoñ ke safar meñ judā.ī detā hai

hazār rañg ḳhizāñ ne bahār ne badle
hazār ruup yahāñ rozgār ne badle

ye kyā zarūr ki nāmoñ ke ham-mizāj hoñ log
bahār aur ḳhizāñ naam haiñ zamānoñ ke