Tags-Khizan

rañg-e-ruḳh par hamāre, zardī sī
nazar aatī hai, kyā ḳhizāñ haiñ ham

turfa chaman khilā hai dil-e-dāġh-dār kā
ya.anī ḳhizāñ se kaam liyā hai bahār kā

ḳhizāñ kī āzmā.ish ho gayā huuñ
maiñ ik jañgal kī chāhat meñ harā huuñ

jo mere dil kī ujaaḌ bastī meñ ek mausam Thahar gayā hai
balā se aa.e bahār yā phir ḳhizāñ ruteñ kyā shumār karnā

ḳhizāñ se peshtar saarā chaman barbād hotā hai
ġhazab hotā hai jab ḳhud bāġhbāñ sayyād hotā hai

ġham-e-hayāt bhī āġhosh-e-husn-e-yār meñ hai
ye vo ḳhizāñ hai jo Duubī huī bahār meñ hai

dil mirā barg-e-ḳhizāñ-dīda kī mānind sahī
maiñ parastār-e-bahārāñ huuñ hamesha kī tarah

jiite haiñ to dikhā deñge dāva-e-andalīb
gul bin ḳhizāñ meñ ab ke vo rahtī hai mar ki ham

ḳhizāñ kī bad-havāsī us ke chehre se hai zāhir
jahāñ ko mausam-e-gul kī ḳhabar karne kā din hai

merā rañg ruup bigaḌ gayā mirā yaar mujh se bichhaḌ gayā
jo chaman ḳhizāñ se ujaḌ gayā maiñ usī kī fasl-e-bahār huuñ

ye baat sach hai maiñ barg-e-ḳhizāñ-rasīda huuñ
magar salām kiyā kartī hai bahār mujhe

ajiib taur se badle haiñ mausamoñ ne chalan
bahār dasht meñ rahtī hai aur ḳhizāñ ghar meñ

ġhubār-e-shahr meñ use na DhūñD jo ḳhizāñ kī shab
havā kī raah se milā, havā kī raah par gayā

ḳhizāñ-rasīda kisī naḳhl-e-nīm-jāñ ke tale
mujhe bhī dekh usī shām-e-zard-rū meñ huuñ

chaman kahāñ jo ḳhayāl-e-ḳhizāñ chaman meñ rahe
bahār hī vo nahīñ hosh jis bahār meñ hai

firāq-e-yār kā ḳhatra visāl-e-yār meñ hai
ḳhizāñ kī fikr ḳhizāñ meñ na thī bahār meñ hai

itnī zardī saarī duniyā kī ḳhizāñ meñ bhī na ho
jitnī aur zālim tirī ulfat ke bīmāroñ meñ hai

ek vīrān darīche pe ḳhizāñ kī bārish
koī tasvīr banātī rahī āvāz ke saath

maiñ bad-qismat vo gulshan huuñ ḳhizāñ jis kā muqaddar hai
bahār aatī hai darvāze se aa kar lauT jaatī hai

maiñ vo musāfir-e-ġhamgīñ huuñ jis ke saath 'vasīm'
ḳhizāñ ke daur se bhī kuchh duur chal ke chal na sake