Tags-Khizan

mausam-e-sheb meñ be-fā.eda hai la.ab-e-shabāb
kab samar deve hai jo naḳhl ḳhizāñ par aayā

kahīñ pe taare kahīñ par haiñ aas ke jugnū
ḳhizāñ meñ bhī maiñ guloñ kī fazā banātī huuñ

mausam-e-dil ne bikhere dil ke bāhar apne rañg
rañg-e-gul us ke liye rañg-e-ḳhizāñ mere liye

bhale hī chhāñv na de aasrā to detā hai
ye aarzū kā shajar hai ḳhizāñ-rasīda sahī

jis ko kahte haiñ nasīm aaj vo hai bād-e-sumūm
aur kabhī fasl-e-ḳhizāñ ko bhī bahārāñ samjhe

gulshan pe hai ḳhizāñ kā tasallut to ġham nahīñ
dil meñ fareb-e-husn-e-bahārāñ sajā ke lā

bahal na jaa.e kahīñ ye dil-e-ḳhizāñ-mānūs
bahār aa ke dikhātī hai dilkashī apnī

zaḳhmoñ se dil kā aalam kyā pūchhte ho kyā hai
gulzār-e-be-ḳhizāñ huuñ duniyā-e-rañg-o-bū huuñ

lāla-o-gul pe ḳhizāñ aaj bhī jab chhā.ī hai
kaun kahtā hai gulistāñ meñ bahār aa.ī hai

sair kar 'mīr' is chaman kī shitāb
hai ḳhizāñ bhī surāġh meñ gul ke

ye haiñ apne zehn ke aks sab yahāñ asl kyā hai ḳhayāl kyā
ye ḳhizāñ ke rañg haiñ be-ḳhabar to samajh rahā hai bahār hai

hijr meñ vasl-e-yār kī bāteñ
haiñ ḳhizāñ meñ bahār kī bāteñ

āñkhoñ meñ liye jalva-e-nairañg-e-tamāshā
aa.ī hai ḳhizāñ jashn-e-bahārāñ se guzar ke

ḳhizāñ se jin ko bachā laa.e the jatan kar ke
vo naḳhl ab ke bahāroñ meñ jal ga.e kaise

chaman meñ lāla-o-gul par nikhār bhī to nahīñ
ḳhizāñ agar ye nahīñ hai bahār bhī to nahīñ

ḳhizāñ ke āġhāz meñ ye achchhā huā ki maiñ bhī
ḳhud apne jaise fasurda logoñ meñ lauT aayā

Daalī se chhūT jaane kā anjām kyā huā
barg-e-ḳhizāñ-rasīda kī āvārgī se pūchh

har zabāñ par thā kabhī tazkira-e-daur-e-bahār
har zabāñ shikva-gar-e-jaur-e-ḳhizāñ hai ki nahīñ

vo gul-parast jin pe bahāroñ ko naaz thā
aa.ī ḳhizāñ to pā-e-ḳhizāñ se lipaT ga.e

itnā maġhrūr kyuuñ bāġhbāñ hai
ye chaman chaar din meñ ḳhizāñ hai