Tags-Khizan

zavāl par thī bahār kī rut
ḳhizāñ kā mausam uruuj par thā

mirī zindagī pe na muskurā mujhe zindagī kā alam nahīñ
jise tere ġham se ho vāsta vo ḳhizāñ bahār se kam nahīñ

bahār meñ tū na jaane kaise kahāñ pe ġham thā
ḳhizāñ meñ mujh ko pukārtā hai yahī bahut hai

umiid hī to dil-shajar kī āḳhirī asaas thī
shagūfa ye bhī ho gayā ḳhizāñ se pā.emāl kyā

jo vaqt mehrbāñ huā to ḳhaar phuul ban ga.e
ḳhizāñ kī zard zard sī qabā hī aur ho ga.ī

ḳhizāñ ne apne naam kī ridā jo gul pe Daal dī
chaman kā rañg uḌ gayā sabā hī aur ho ga.ī

begāna-e-qayūd-e-bahār-o-ḳhizāñ rahe
yārab mirā junūn-e-mohabbat javāñ rahe

zard aatā hai nazar ḳhauf-e-ḳhizāñ se vo bhī
ek pattā jo sar-e-shāḳh-e-shajar baaqī hai

mausam-e-gul par ḳhizāñ kā zor chal jaatā hai kyuuñ
har hasīñ manzar bahut jaldī badal jaatā hai kyuuñ

rut ḳhizāñ kī hai aur harī huī hai
shāḳh-e-gul tū to bāvrī huī hai

ab yaad kabhī aa.e to ā.īne se pūchho
'mahbūb-ḳhizāñ' shaam ko ghar kyuuñ nahīñ jaate

mujhe is apnī ḳhizāñ meñ jo chiiz yaad hai vo har ek rāste
maiñ an-ginat putliyoñ kī gardish kā karb jaise

'bebāk' ruḳh pe chhāne lage haiñ ḳhizāñ ke rañg
go hāsil-e-bahār to tū bhī hai maiñ bhī huuñ

dekhī kaifiyyat-e-bahār-o-ḳhizāñ
maiñ do-rañgī se āshnā na huā

harī vaadī kā afsūñ TūTtā hai
ḳhizāñ kuchh rañg vo dikhlā rahī hai

kyā batā.eñ ġham-e-furqat meñ kahāñ se guzre
mausam-e-gul se jo nikle to ḳhizāñ se guzre

had-bandī-e-ḳhizāñ se hisār-e-bahār tak
jaañ raqs kar sake to koī fāsla nahīñ

sukūt-e-shām-e-ḳhizāñ hai qarīb aa jaao
baḌā udaas samāñ hai qarīb aa jaao

ḳhizāñ ke ba.ad bahāroñ kī raah dekhī to
ye haif sad ki mirī aarzū ke paat jale

us ko patā nahīñ hai ḳhizāñ ke mizāj kā
vo vāqif-e-bahār huā hai abhī abhī