Tags-Khizan

safed bāloñ pe kyā rañg de rahā hai ḳhizāb
ab ibtidā-e-ḳhizāñ hai aur intihā-e-bahār

maiñ bāġhbānoñ kī sāzishoñ ko siyāsatoñ ko samajh chukā huuñ
ḳhizāñ kā khā kar fareb-e-paiham uThā ke barq-o-sharar kā dhokā

vā.izāñ muzhda ki jannat meñ bahār aa.ī hai
merī duniyā se ḳhizāñ lauT ke jaa.e to bane

aave ḳhizāñ chaman kī taraf gar maiñ rū karūñ
ġhuncha kare guloñ ko sabā gar maiñ bū karūñ

bas-ki har kāñTe se dil chhed ek bulbul mar rahe
ho gayā gulshan ḳhizāñ meñ bulbulistāñ al-ayāz

vo jo haiñ is gulshan-e-hastī meñ ab mahv-e-fanā
un ke aage mausam-e-bād-e-ḳhizāñ ko ishq hai

ruḳh-e-numū ko shikāyat faqat ḳhizāñ se nahīñ
bahār meñ bhī huī kisht-e-jism-o-jāñ barbād

sajā.ūñ vo chaman jinheñ ḳhizāñ kabhī na chhū sake
tirī tarah jo hukmarāñ shaguft har chaman pe huuñ

fazā meñ uḌtā huā kahīñ se ajab nahīñ aks-e-barg aa.e
ḳhizāñ ke be-rañg āsmāñ se aTī huī jhiil chal ke dekheñ

shāḳh-e-gul ke gale se lag lag kar
rote haiñ mausam-e-ḳhizāñ meñ ham

bū-e-gul raqs meñ hai bād-e-ḳhizāñ raqs meñ hai
ye zamīñ raqs meñ hai saarā jahāñ raqs meñ hai

aaj ḳhizāñ ke haath gulistāñ bech diye haiñ yāroñ ne
fasl-e-gul ko yaad kareñge dekh ke ye vīrāne log

gulzār meñ vo rut bhī kabhī aa ke rahegī
jab koī kalī jaur ḳhizāñ ke na sahegī

is ahd-e-ḳhizāñ meñ kisī ummīd ke mānind
patthar se nikal aa.uuñ magar abr to barse

tire ishāra-e-abrū pe rut badaltī hai
bahār hai na tasallut meñ hai ḳhizāñ mere

haa.e vo jis kī ummīdeñ hoñ ḳhizāñ par mauqūf
shāḳh-e-gul suukh ke gir jaa.e to kāshāna bane

ḳhizāñ ke ḳhauf se lutf-e-bahār kyoñ chhoḌeñ
yahī to soch ke gul muskurā.e jaate haiñ

jo chashm-e-anjām-e-bīñ se dekhā bahār do din hai phir ḳhizāñ hai
ma.āl-e-gulshan pe roī shabnam hañse gul-e-tar jo khil-khilā kar

ai ḳhizāñ chun le zarā ab āshiyāñ apnā kahīñ
ruuh meñ yādeñ basī haiñ sar jhukā kar dekhnā

uchak liyā hai unheñ bhī ḳhizāñ ke mausam ne
vo phūl-pāt ki jin ko bahār honā thā