Tags-Khizan

bād-e-ḳhizāñ ko kyā parvā hai
us ko to peḌoñ ko girānā hī aatā hai

ḳhāshāk se ḳhizāñ meñ rahā naam baaġh kā
varna to har daraḳht pe qabza hai zaaġh kā

ye to ḳhizāñ-nasīb bahāroñ se pūchhiye
vābasta-e-ḳhulūs rahe gulistāñ se ham

tumhāre ba.ad ḳhizāñ ho bahār ho kuchh ho
kahāñ rutoñ se mirā sābiqa tumhāre ba.ad

chaman kī ḳhaak meñ ibrat kī dāstāneñ haiñ
sisak rahī haiñ bahāreñ ḳhizāñ kā Derā hai

har-chand thī vahāñ bhī ḳhizāñ kī udaas dhuup
dil par nahīñ thā ġham kā asar us dayār meñ

daftar-e-lāla-o-gul hai na vo dīvān-e-bahār
zīnat-e-lauh-e-chaman harf-e-ḳhizāñ hai ki jo thā

is daur-e-ḳhizāñ-nasīb meñ bhī
kaliyāñ sī khilā khilā gayā huuñ

dekhī hī nahīñ ḳhizāñ kī sūrat
kis gulshan-e-shauq kī havā huuñ

ho farāġhat to zarā jhāḌū ḳhayāloñ ke shajar
shāḳh-sāroñ pe bahut barg-e-ḳhizāñ pāoge

aa.egā koī chal ke ḳhizāñ se bahār meñ
sadiyāñ guzar ga.ī haiñ isī intizār meñ

kaisā māyūs thā vo daur-e-ḳhizāñ bhī mat pūchh
thā use shāḳh se pattoñ ko girāne kā malāl

dil-lagī bād-e-ḳhizāñ kar le gulistānoñ ke saath
ho chale haiñ ham bhī kuchh mānūs vīrānoñ ke saath

vo naġhme jo ḳhizāñ ko phir bahār-e-nau banāte haiñ
unhī gītoñ kī hoñToñ par na.ī sargam liye haiñ ham

ab ḳhizāñ ko salām bhejūñgā
shāḳhoñ par pattiyāñ banā lī haiñ

nāz-e-chaman vahī hai bulbul se go ḳhizāñ hai
Tahnī jo zard bhī hai so shāḳh-e-za.afarāñ hai

ḳhud pe har rut ko guzarte hue dekhā thā magar
kyā ḳhabar thī ki yahīñ ek ḳhizāñ Thahregī

vo kyā din the yahīñ ham ne bahāroñ kī duā kī thī kisī ne bhī nahīñ sochā
chaman vāloñ ne mil kar jab ḳhud apnā hī chaman luuTā ḳhizāñ ke āḳhirī din the

bahār aa.ī na thī lekin havāoñ meñ na.e mausam kī ḳhushbū raqs kartī thī
achānak jab kahā tum ne mire muñh par mujhe jhūTā ḳhizāñ ke āḳhirī din the

tumhārā haath jab mere larazte haath se chhūTā ḳhizāñ ke āḳhirī din the
vo mohkam be-lachak va.ada khilaune kī tarah TuuTā ḳhizāñ ke āḳhirī din the