Tags-Khizan

nihāl-e-sham.a meñ kyā ḳhushnumā ik phuul aayā thā
sitam Dhāyā nasīm-e-sub.h ne bād-e-ḳhizāñ ho kar

ḳhudā rakkhe dil-e-māyūs meñ ummīd baaqī hai
yahī gul hai jo bū detā hai pāmāl-e-ḳhizāñ ho kar

sitam hai mubtalā-e-ishq ho jaanā javāñ ho kar
hamāre bāġh-e-hastī meñ bahār aa.ī ḳhizāñ ho kar

chaman kī dilchaspiyāñ kahāñ haiñ na chahchahe haiñ na qahqahe haiñ
qadam jamā.e haiñ kyā ḳhizāñ ne ki aaj rañg-e-bahār badlā

guloñ kā daur hai bulbul maze bahār meñ luuT
ḳhizāñ machā.egī aate hī is dayār meñ luuT

burā ḳhizāñ kā ho dekhe jo sūkhe sūkhe hoñT
ġharīb phuul pe mujh ko ġhazab kā pyaar aayā

ḳhizāñ kā daur gayā mausam-e-bahār aayā
magar na is dil-e-be-sabr ko qarār aayā

jo fasl-e-ḳhizāñ meñ kāñToñ par raqsān-o-ġhazal-ḳhvāñ guzre the
vo mausam-e-gul meñ bhuul ga.e phūloñ meñ bhī ḳhanjar hotā hai

kis ko chhoḌā ḳhizāñ ne magar
zaḳhm dil kā harā rah gayā

kaf-e-ḳhizāñ pe khilā maiñ is e'tibār ke saath
ki har numū kā ta.alluq nahīñ bahār ke saath

ye haath chūme ga.e phir bhī be-gulāb rahe
jo rut bhī aa.ī ḳhizāñ kī safīr aisī thī

zindagī hai to ḳhizāñ ke bhī guzar jā.eñge din
fasl-e-gul jītoñ ko phir agle baras aatī hai

huā na ḳhatm azāboñ kā silsila ab tak
ḳhizāñ kī zad meñ bhī ik phuul hai harā ab tak

ragoñ meñ ḳhuun hai shāḳhoñ kī surḳh-rū ġhunche
ḳhizāñ meñ ab ke bahāroñ kī rañg-o-bū kaisī

ḳhaak phūlūñ-phalūñ is gulshan-e-vīrāñ meñ'' 'haqīr'
bāġh-e-hastī se ḳhizāñ kā nahīñ khaTkā jaatā

jo pāmāl-e-ḳhizāñ haiñ ik din ḳhāk-e-chaman se uTTheñge
un kā hashr na jaane kyā ho jo maqtūl-e-bahārāñ haiñ

afsurdagi-e-dil se ye rañg hai suḳhan meñ
ya.anī ḳhizāñ-rasīda kuchh phuul haiñ chaman meñ

bulbul kā dil ḳhizāñ ke sadme se hil rahā hai
gulzār kā muraqqa.a miTTī meñ mil rahā hai

dhuup se sahme parindoñ ko amaañ miltī nahīñ
saḳhti-e-mahr-e-ḳhizāñ se ḳhushk jañgal ho ga.e