Tags-Khizan

koī to aa.e ḳhizāñ meñ patte ugāne vaalā
guloñ kī ḳhushbū ko qaid karnā koī to sīkhe

maiñ mutma.in huuñ agarche ḳharāb hai māhaul
ḳhizāñ ke ba.ad kā aalam bahār hotā hai

ye jo rañg-e-nā-murādī khil rahā hai chār-sū
ai ḳhizāñ is kā sabab kyā hai ye zar kis ke liye

kyā ḳhabar tujh ko asīr-e-nau-e-bahār
kitnī ra.anā.ī ḳhizāñ se aa.ī hai

ye iftiḳhār-e-shajar shāḳh-e-nau-bahār se hai
jo pā.emāl-e-ḳhizāñ thā vo sar-buland huā

ḳhizāñ meñ bhī rahā 'kausar' shagufta hausla apnā
bahār-e-naġhma sāz-e-dard kā āhañg ham se hai

ḳhizāñ ke jaane se ho yā bahār aane se
chaman meñ phuul khileñge kisī bahāne se

ye yād-e-lutf-e-bahārāñ bhī kam nahīñ hai 'habīb'
bharī ḳhizāñ meñ bhī kyā ham ḳhizāñ kī baat kareñ

chaman meñ rah ke bhī 'ātish' ḳhizāñ-nasīboñ ko
kabhī bahār kā paiġhām-e-jāñ-fazā na milā

tirī talab thī tire āstāñ se lauT aa.e
ḳhizāñ-nasīb rahe gulsitāñ se lauT aa.e

ajnabī ḳhushbū kī aahaT se mahak uTThā badan
qahqahoñ ke lams se ḳhauf-e-ḳhizāñ raushan huā

asar-e-bahār-e-ḳhizāñ asar hai ki hai fasurda mirī nazar
na havā-e-ishrat-e-bāl-o-par na junūn-e-bāġh-e-jināñ rahā

ye bahār-e-gulshan-e-āb-o-gil hai fanā asar to hoñ kyuuñ ḳhajil
vo gul-e-fasurda hai merā dil ki hamesha nazr-e-ḳhizāñ rahā

misāl-e-barg-e-ḳhizāñ sarsar-e-firāq se aah
paTakte phirte haiñ sar ham tabāh ke maare

savāl-e-sub.h-e-chaman zulmat-e-ḳhizāñ se uThā
ye nafa.a kam to nahīñ hai jo is ziyāñ se uThā

chaman meñ rah ke bhī 'qaisar' mujhe nahīñ ma.alūm
bahār kahiye use yā use ḳhizāñ kahiye

ġhubār-e-shahr meñ use na DhūñD jo ḳhizāñ kī shab
havā kī raah se milā, havā kī raah par gayā

khilte rahe haiñ jo gul bād-e-ḳhizāñ kī shah par
dast-e-sabā ne baḌh kar un ko masal diyā hai

maiñ ek naḳhl thā yak-rañgī ḳhizāñ kā asiir
ye saare rañg tirī aarzū ke saath aa.e

ḳhizāñ kahtī thī maiñ shoḳhi-e-bahārāñ huuñ
bahār kahtī hai rañgīni-e-ḳhizāñ huuñ maiñ