Tags-Khizan

na pahuñchī chaman tak ḳhizāñ aa ga.ī
diloñ ke kañval khil ke kumhlā ga.e

na vo aarzū hai na justujū na koī tasavvur-e-rañg-o-bū
liye dil meñ dāġh-e-ġham-e-ḳhizāñ maiñ chaman se duur nikal ga.ī

jis ne tirī ḳhizāñ ke aise nikhār dekhe
gulzār-e-ḳhuld kī phir vo kyā bahār dekhe

maiñ ḳhushk shāḳh-e-ḳhazāñ pe yūñhī nahīñ baiThā
yahāñ se abr kā parcham dikhā.ī detā hai

kāñToñ ne bhī ḳhizāñ kī ġhulāmī qubūl kī
dekho to aaj chehra-e-gul pur-ḳharāsh hai

jaane kitnī sadiyoñ se har baras ḳhizāñ-rut meñ
ḳhushk patte dhartī par zard shaal bunte haiñ

ḳhizāñ ke aane se pahle hī thā mujhe ma.alūm
ki rañg-o-bū-e-chaman kā kuchh e'tibār nahīñ

vo gul huuñ ḳhizāñ ne jise barbād kiyā hai
uljhūñ kisī dāman se maiñ vo ḳhaar nahīñ huuñ

ham apne ġham ko ḳhushī meñ shumār kar leñge
ḳhizāñ ke daur meñ jashn-e-bahār kar leñge

ai gul aatī hai ḳhizāñ baaġh meñ Thahrā na mujhe
dekhūñ in āñkhoñ se utrā huā chehrā terā

ḳhizāñ kī shaal meñ lipTe shajar pe parvāne
numū ke giit likhe rañg-e-mumkināt ke saath

had-bandī-e-ḳhizāñ se hisār-e-bahār tak
jaañ raqs kar sake to koī fāsla nahīñ

ḳhizāñ se joḌ ke rishta bahār kā koī
ḳhushī nahīñ na sahī ġham to de gayā koī

ḳhizāñ kā saaya na paḌ jaa.e is gulistāñ par
uThāo parcham-e-gul ai chaman ke matvālo

ḳhizāñ ke patte gul-o-yāsman kī vaadī meñ
uḌā ke laa.e haiñ bād-e-shimāl ke tūfāñ

vahī sayyād kī ghāteñ haiñ vahī kunj-e-qafas
fasl-e-gul rehn-e-ġham-e-jaur-e-ḳhizāñ hai yaaro

bahār-e-chañd-roza se koī māñge to kyā māñge
ḳhizāñ ko bhī nadāmat haath phailāne se hotī hai

fasl-e-gul aa.ī ḳhizāñ bhī hue gulzār magar
tā.ir-e-dil hai hunūz un ke giraftāroñ meñ

rakhe tāj-e-zar ko sar par chaman zamāna meñ gil
na shagufta ho tū itnā ki ḳhizāñ hai ye bahārāñ

mirī bahār meñ aalam ḳhizāñ kā rahtā hai
huā jo vasl to khaTkā rahā judā.ī kā