Tags-Khizan

ham apne jism-o-jāñ ko ḳhizāñ meñ utaar kar
gulnār mausamoñ ke hunar dekhte rahe

qadam qadam pe hameñ rañg-o-bū kā dhokā hai
ḳhizāñ-nasīb rafīqo ye daur kaisā hai

jalā ke dāġh-e-mohabbat ne dil ko ḳhaak kiyā
bahār aa.ī mire baaġh meñ ḳhizāñ kī tarah

fasl-e-gul meñ bhī dikhātā hai ḳhizāñ-dīda-daraḳht
TuuT kar dene pe aa.e to ghaTā jaisā bhī hai

ye siyāsat-e-bahārāñ hai ḳhizāñ kī be-panāhī
ki jo jal uThe nasheman to chaman na de gavāhī

tumhāre ba.ad chaman par jab ik nazar Daalī
kalī kalī meñ ḳhizāñ ke charāġh jalte the

ḳhizāñ thī aur ḳhizāñ sī ḳhizāñ ḳhudā kī panāh
tirā ḳhayāl thā jis ne harā-bharā rakkhā

na.e karishme dikhātā hai e'tibār mujhe
ḳhizāñ hai ālam-e-nairañgī-e-bahār mujhe

ye bahār vo hai jahāñ rahī asar-e-ḳhizāñ se barī rahī
jo salīb-o-dār meñ Dhal ga.ī vahī chob-e-ḳhushk harī rahī

na gul hañste na kaliyāñ muskurātīñ phir bahārāñ meñ
ḳhabar hotī agar un ko ḳhizāñ-ḳhurda chaman hogā

zikr-e-bahār bhī rahā zikr-e-ḳhizāñ ke saath
terī bhī dāstāñ hai mirī dāstāñ ke saath

vo naḳhl-e-ḳhizāñ-dīda huuñ us dasht meñ jis ke
saaye meñ kisī pahuñche ne bisrām na paayā

lagne dūñgā na havā tujh ko ḳhizāñ kī maiñ 'zafar'
phuul jaisā tirā anjām na hone dūñgā

jamā thā jis vaqt rañg-e-sohbat thā nek-o-bad meñ bhī lutf-e-ḳhullat
magar ḳhizāñ aa.ī yā qayāmat na phuul dekhā na ḳhaar dekhā

banā ke ā.īna-e-tasavvur jahāñ dil-e-dāġh-dār dekhā
firāq meñ lutf-e-vasl paayā ḳhizāñ meñ rañg-e-bahār dekhā

burīda shāḳh-e-shajar kā shikasta pattoñ kā
tire sivā bhī koī mauja-e-ḳhizāñ huā hai

ai bād-e-ḳhizāñ vo kyā hue gul
ḳhaak uḌne lagī hai kyuuñ chaman meñ

chaman kā lutf khotā hai chaman meñ ajnabī honā
ḳhizāñ bhī apne gulshan kī bhalī ma.alūm hotī hai

the bazm meñ vo ġhuncha-e-afsurda sharm se
kyūñkar kahūñ bahār meñ rañg-e-ḳhizāñ na thā

maiñ shāḳh-e-sabz huuñ mujh ko utaar kāġhaz par
mirī tamām bahāroñ ko be-ḳhizāñ kar de