Tags-Khizan

jaate haiñ ki guzrā hai ye din jin kī ḳhizāñ meñ
āñkhoñ meñ bahār un ke liye laa.e haiñ yaaro

fasl-e-ḳhizāñ meñ kyā hogā āsār numāyāñ haiñ jis ke
fasl-e-bahār meñ 'barqī' apne dil kī kalī murjhā.e to

tum saḳhtī-e-rāh kā ġham na karo har daur kī raah meñ ham-safaro
jahāñ dasht-e-ḳhizāñ vahīñ vādī-e-gul jahāñ dhuup kaḌī vahāñ chhāñv ghanī

ḳhizāñ ne jin ke muqaddar meñ zardiyāñ likh diiñ
ham un gulāb-rutoñ ko bhī surḳh-rū kiye jaa.eñ

bād-e-ḳhizāñ kā shukr karo 'faiz' jis ke haath
naame kisī bahār-e-shimā.il se aa.e haiñ

ḳhizāñ meñ aag lagāo bahār ke din haiñ
na.e shagūfe khilāo bahār ke din haiñ

ulaT do taḳhta ḳhizāñ kī tabāh-kārī kā
bisāt-e-aish bichhāo bahār ke din haiñ

bāġh-e-jahāñ se jaate nahīñ jānib-e-bahisht
nāhaq tamāñche khāte haiñ bād-e-ḳhizāñ ke log

vo chale ḳhizāñ ke Dere ki hai āmad-e-bahārāñ
shab-e-ġham ke rah-nashīnoñ kaho ab salāh-e-yārāñ

hamāre pyaar kī ye bhī adā nirālī hai
ḳhizāñ kī rut meñ manāyā bahār kā mausam

unhīñ ko haq hai bahāroñ ke ḳhair maqdam kā
guzar ke jo kisī daur-e-ḳhizāñ se aa.e haiñ

havā kī tarah na dekhī mirī ḳhizāñ kī bahār
khilā ke phuul mirā ḳhush-nazar chalā bhī gayā

māyūs ḳhud-ba-ḳhud dil-e-ummīd-vār hai
is gul meñ bū ḳhizāñ kī hai rañg-e-bahār hai

jab yahāñ is shahr meñ sab kuchh ḳhizāñ-āsār hai
be-dar-o-dīvār kā ik ghar banā.ūñ kis tarah

ḳhizāñ meñ patte bhī aise kahāñ jhaḌe hoñge
hamārī āñkhoñ se juuñ hijr meñ jhaḌe aañsū

rahī jo barq se mahfūz pāmāl-e-ḳhizāñ hogī
ġham-e-anjām-e-shāḳh-e-āshiyāñ yuuñ bhī hai aur yuuñ bhī

un ke khilte hue joban ko vo murjhā na sakā
aane ko daur-e-ḳhizāñ sāl-ba-sāl aatā hai

hamārā naam thā āshufta-hāl logoñ meñ
ḳhizāñ-pasand tabī.at kā apnī charchā thā

us ko ḳhizāñ ke aane kā kyā ranj kyā qalaq
rote kaTā ho jis ko zamāna bahār kā

dil-e-hazīñ ko mire jalva-zār hone do
ḳhizāñ-nasīb chaman meñ bahār hone do