Tags-Khizan

jab naḳhl-e-ārzū pe ḳhizāñ ibtilā huī
maiñ dast-zad savābit-o-sayyār se huā

mahaktā thā badan har vaqt jis ke lams-e-ḳhush-bū se
vahī gul-dasta dahlīz-e-ḳhizāñ par chhoḌ denā thā

mujhe haiñ ḳhaar se kuchh ḳhaas nisbateñ ki ye gul
bahār meñ na khilā raunaq-e-ḳhizāñ ke liye

koī bahār kī ḳhātir koī ḳhizāñ ke liye
bas ek maiñ hī rahā sirf gulsitāñ ke liye

gul ke mānind ye sarāpā thā
jaane kab aa ga.ī ḳhizāñ mujh par

asīr-e-band-e-ḳhizāñ huuñ na pūchh ai sayyād
ḳhirām kyā hai sabā kyā hai gulsitāñ kyā hai

ḳhizāñ kī zard sī rañgat badal bhī saktī hai
bahār aane kī sūrat nikal bhī saktī hai

'zarrīñ' kyā bahāroñ ko muḌ muḌ ke dekhiye
mānūs the ḳhizāñ kī dil-āsā.iyoñ se ham

use chaman kī bahār-o-ḳhizāñ se kyā matlab
vo ek bholī sī chiḌiyā thī chahchahātī rahī

na.e zaḳhm haiñ na.ī koñpleñ abhī dil pe ġham kī bahār hai
ye duā karo ki ḳhizāñ meñ bhī ye daraḳht yūñhī harā rahe

kyā kahūñ ab tumheñ ḳhizāñ vaalo
jal gayā āshiyāñ meñ kyā kyā kuchh

aamad aamad ḳhizāñ kī hai shāyad
gul shagufta huā chaman meñ hai

ḳhizāñ kā daur to ho jaa.e ruḳhsat
gulistāñ meñ bahār aa.e na aa.e

maiñ samajhtā huuñ phir bahār aa.ī
koī letā hai jab ḳhizāñ kā naam

ḳhizāñ meñ chāk-garebāñ thā maiñ bahār meñ tū
magar ye fasl-e-sitam-āshnā kisī kī nahīñ

ajnabī ḳhushbū kī aahaT se mahak uTThā badan
qahqahoñ ke lams se ḳhauf-e-ḳhizāñ raushan huā

hinā-e-pā-e-ḳhizāñ hai bahār agar hai yahī
davām-e-kulfat-e-ḳhātir hai aish duniyā kā

hamāre shahr meñ phūloñ kā zikr kaun kare
hamāre shahr meñ 'sādī' ḳhizāñ ziyāda hai

banā ke kāġhzī gul log ye samajhte haiñ
ki ik hunar hai ḳhizāñ ko bahār karnā bhī

ishq se sar-garāñ na ho husn se bad-gumāñ na ho
jis ke liye ḳhizāñ na ho us ke liye bahār kyā