Tags-Khizan

tire andar kahāñ sabza ugegā
ḳhizāñ meñ kāsht-kārī ho rahī hai

tum duur ho to laakh bahāreñ bhī haiñ ḳhizāñ
tum paas ho agar to ḳhizāñ bhī bahār hai

ḳhizāñ ke mausam-e-ḳhāmosh ne sadā dī hai
jamāl-e-dost ne phir bhī mujhe pukārā nahīñ

ḳhizāñ kā daur gayā mausam-e-bahār aayā
magar na us dil-e-be-sabr ko qarār aayā

ik zamāna huā ḳhizāñ guzre
dil ujaḌne kī ab ḳhabar aa.ī

dāġhoñ se dil-o-sīna ke afroḳhta-jāñ huuñ
go maiñ chaman-e-tāza huuñ par vaqf-e-ḳhizāñ huuñ

shaam kī sīḌhiyāñ kitnī kirnoñ kā maqtal banīñ
bād-e-masmūm ne toḌ kar kitne patte supurd-e-ḳhizāñ kar diye

gulshan meñ ḳhizāñ ab aa pahuñchī mai-ḳhāne meñ jī kyuuñ kar bahle
vo rañg nahīñ vo lutf nahīñ vo daur nahīñ vo jaam nahīñ

use ḳhatra hai sirf ik fasl-e-gul kā
ḳhizāñ ko kis qadar āsūdgī hai

'raihanī'-e-hazīñ hai ḳhizāñ meñ ġhazal-sarā
rañgnī-e-bahār kā saudā liye hue

dikhā.ī aaj hī āñkhoñ ne sūrat-e-fardā
ḳhizāñ kī sair bhī hañgāma-e-bahār meñ hai

ḳhizāñ kī fasl meñ jo rizq-e-vahshat-e-shab thā
luTā rahā huuñ sar-e-shab vahī ḳhazīna-e-ḳhvāb

ḳhizāñ kā zahr saare shahr kī rag rag meñ utrā hai
galī-kūchoñ meñ ab to zard chehre dekhne hoñge

ilāhī ḳhizāñ kā badal jaa.e chehrā
chaman meñ shagūfe khilāne chalā huuñ

girā.īñ shāḳh shāḳh se ḳhizāñ ne phuul pattiyāñ
uḌe jo biij har taraf to phir bahār aa ga.ī

havā ke khel meñ shirkat ke vāste mujh ko
ḳhizāñ ne shāḳh se pheñkā hai rahguzār ke biich

na samjho tum ise shor-e-bahārāñ
ḳhizāñ pattoñ meñ chhup kar ro rahī hai

is dil meñ to ḳhizāñ kī havā tak nahīñ lagī
is phuul ko tabāh kiyā hai bahār ne

maiñ ḳhizāñ ko lagā chukā huuñ gale
ab zarūrat nahīñ bahāroñ kī