Tags-Khizan

ye ahd-e-javānī shoḳhī-e-gul do din kī bahāreñ hotī haiñ
dekheñ to kabhī vo rañg-e-ḳhizāñ jo husn pe nāzāñ hote haiñ

kalī dil-e-tabāh kī khilī na 'chishti'-e-hazīñ
ḳhizāñ bhī aa ke jā chukī bahār bhī guzar ga.ī

mire nasīb kā nauha ḳhizāñ ye ahd-e-ḳhizāñ
tire karam kā fasāna bahār guzrī bahār

pata shahr-e-dil kī bahāroñ kā ab tum
kahīñ bām-o-dar kī ḳhizāñ hī meñ DhūñDo

donoñ hī ro paḌe haiñ sar-e-mausam-e-ḳhizāñ
maiñ dekh kar shajar ko shajar dekh kar mujhe

jaane se us ke baaġh meñ aalam ḳhizāñ kā thā
sūkhe guloñ meñ qaid vo vahshat ġhazab kī thī

ḳhizāñ ke zard dinoñ kī siyāh rātoñ meñ
kisī kā phuul sā chehra dikhā.ī detā hai

fasl-e-ḳhizāñ meñ sair jo kī ham ne jā-e-gul
chhānī chaman kī ḳhaak na thā naqsh-e-pā-e-gul

abhī is meñ ḳhizāñ aane na paa.e
ye nau-ras ārzūoñ kā chaman hai

ḳhizāñ ke zaḳhm havā kī mahak se bharne lage
nigār-e-gul ke ḳhad-o-ḳhāl phir nikharne lage

yahī tañg haal jo sab kā hai ye karishma qudrat-e-rab kā hai
jo bahār thī so ḳhizāñ huī jo ḳhizāñ thī ab vo bahār hai

hamāre ahd kā manzar ajiib manzar hai
bahār chehre pe dil meñ ḳhizāñ kā daftar hai

maiñ huuñ nā-ḳhush ki ḳhizāñ aan paḌī hai be-vaqt
bāġhbāñ ḳhush hai ki nuqsān kisī aur kā hai

shādāb bahāroñ ke tamannā.ī kahāñ haiñ
mausam ke qadam zaḳhm-e-ḳhizāñ tak nikal aa.e

kahīñ na aisā ho apnā vaqār khā jaa.e
ḳhizāñ se phuul bachā.eñ bahār khā jaa.e

ḳhizāñ kā vaar bahut kār-gar thā dil pe magar
bahut bachā ke rakhā ye gulāb maiñ ne bhī

aatī hai zindagī meñ ḳhizāñ bhī bahār bhī
sehn-e-chaman meñ phuul bhī hote haiñ ḳhaar bhī

barg-e-ḳhizāñ-rasīda huuñ chheḌ na mujh ko ai nasīm
zauq fuġhāñ kā hai mujhe shikva-e-abr-e-tar nahīñ

banā hai hamesha ye dil baaġh o sahrā
bahār aate aate ḳhizāñ aate aate