Tags-Khizan

ḳhizāñ agar apnā ḳhuuñ na baḳhshe to fasl-e-gul kaise surḳh-rū ho
sukūt apnā jigar na chīre to kaise jhankār deñ sadā.eñ

is ke liye 'shakīl' ḳhizāñ kyā bahār kyā
Duubā huā jo husn kī ra.anā.iyoñ meñ hai

naved-e-yaum-e-bahārāñ ḳhizāñ se zāhir ho
misāl-e-saut-e-pareshāñ fuġhāñ se zāhir ho

ḳhizāñ kā rañg hai kaisā suhānā
na patta peḌ se koī jhaḌā hai

ḳhair dhuñdlā.ī sī thī raushnī-e-shām-e-ḳhizāñ
bāġhbāñ vo bhī to is sub.h-e-bahārāñ meñ nahīñ

ḳhizāñ kī shāḳh meñ hairāñ hai aañkh kī koñpal
palaT ke ahd purāne kahāñ se aate haiñ

maiñ kahīñ kā na rahā bād-e-ḳhizāñ ke chalte
uḌ gayā mere muqaddar se nasheman kaisā

udaas peḌoñ ne pattoñ kī bheñT de dī hai
ḳhizāñ meñ raunaq-e-sahn-e-chaman ziyāda huī

jaatā huuñ jab ḳhizāñ meñ nihāloñ ke sāmne
āñkhoñ se nahreñ bahtī haiñ thāloñ ke sāmne

barbād na kar bekas kā chaman bedard ḳhizāñ se kaun kahe
tārāj na kar merā ḳhirman us barq-e-tapāñ se kaun kahe

tū ḳhizāñ meñ jo sair ko nikle
mire ho jaa.eñ be-bahār daraḳht

in ke chehre jagmagāte the ḳhizāñ kī dhuup se
dard kī bārish ho jaise ruup ke bahrūp se

kah rahe haiñ ḳhizāñ zada chehre
ai bahāro yahāñ to ham bhī haiñ

mire ḳhudā mujhe taufīq sar-kashī diide
ḳhizāñ hai sāmne kuchh zikr-e-rañg-o-bū kar luuñ

piirī meñ shuġhl-e-mai hai javānanā roz-o-shab
bū-e-bahār aatī hamārī ḳhizāñ meñ hai

bahār kyā ab ḳhizāñ bhī dekhe ġhurūr-e-husn-e-suḳhanvarī meñ
jo āsmānoñ meñ jā basā thā zamīñ ke qadmoñ meñ aa gayā hai

bahār to ik muġhālta hai ḳhizāñ kī rū-posh hairatoñ kā
jo is tilism-e-jahāñ se guzrā vo dāstānoñ meñ aa gayā hai

nazar azāboñ meñ ghir ga.ī hai suḳhan sarāboñ meñ aa gayā hai
sunā hai ab ke bahār-mausam ḳhizāñ kī bātoñ meñ aa gayā hai

ḳhizāñ-pasand hameñ DhūñDne ko nikle haiñ
hamāre dard kā qissa kahīñ sunā hogā

bad-tar ḳhizāñ se hai hameñ is baaġh kī bahār
boī nifāq phuul meñ hī zahar phal meñ hai