Tags-Khizan

ḳhizāñ ke aate hī gulchīñ ne pher liiñ āñkheñ
kisī se koī vafā kā umīd-vār na ho

ḳhizāñ ke jaur se vāqif koī bahār na ho
kisī kā pairahan-e-husn tār-tār na ho

ruḳhsat-e-mausam-e-gul ke bhī uThāo sadme
itnā āsāñ nahīñ ehsās-e-ḳhizāñ ho jaanā

fasl-e-gul meñ bhī dikhātā hai ḳhizāñ-dīda-daraḳht
TuuT kar dene pe aa.e to ghaTā jaisā bhī hai

gulzār-e-jahāñ meñ gul kī tarah go shaad haiñ ham shādāb haiñ ham
kahtī hai ye hañs kar sub.h-e-ḳhizāñ sab nāz-e-abas ik ḳhvāb haiñ ham

ḳhizāñ ke daur meñ gulshan ko kyā mahsūs hotā hai
ye nāzuk baat samjhegā bhī kaise bevafā koī

zikr-e-gul kyā hai sabā ab ki ḳhizāñ meñ ham ne
dil ko nā-chār lagāyā hai ḳhas o ḳhaar ke saath

ruḳh-e-bahār pe aks-e-ḳhizāñ bhī kitnī der
muḳhālifat pe tulā āsmāñ bhī kitnī der

ab kī chaman meñ gul kā ne naam o ne nishāñ hai
fariyād-e-bulbulāñ hai yā shohra-e-ḳhizāñ hai

kise ḳhabar ki chaman meñ ḳhizāñ kī aamad par
ġhurūr-e-sho.ala-e-gul ko jalāl kyuuñ aayā

ḳhizāñ kī zad meñ hī ab tak tirā gulistāñ thā
hamīñ ne aa ke bahāroñ ko zindagī baḳhshī

haif! kahte haiñ huā gulzār tārāj-e-ḳhizāñ
āshnā apnā bhī vaañ ik sabza-e-begāna thā

ḳhayāl us kā aayā to ḳhizāñ kī shaam kyā
kabhī kabhī to umr kī nadī palaT ga.ī

jo tire husn-e-nazar-gīr se shādāb nahīñ
un bahāroñ ke muqaddar meñ ḳhizāñ hotī hai

ham-safīro na kaho naġhma-zanī ko mujh se
ab chalī bād-e-ḳhizāñ aur gul-e-ḳhandāñ na rahā

mirī nigāh meñ haa.el the barg-o-bār-e-ḳhizāñ
ghirā huā maiñ ajab sāya-e-shajar se thā

āñkhoñ meñ liye jalva-e-nairañg-e-tamāshā
aa.ī hai ḳhizāñ jashn-e-bahārāñ se guzar ke

kuchh zard zard patte nishāñ jo ḳhizāñ ke haiñ
nairañg-e-dil-fareb ye sab āsmāñ ke haiñ

maiñ vo sarv-e-bāġh-e-vajūd huuñ maiñ vo gul huuñ sham-e-hayāt kā
jise fasl-e-gul kī ḳhushī nahīñ jise rañj-e-bād-e-ḳhizāñ nahīñ

guloñ kā daur hai bulbul maze bahār meñ luuT
ḳhizāñ machāegī aate hī is dayār meñ luuT