Tags-Khizan

ḳhizāñ kā daur hai aur dil meñ aarzū ye hai
ki maiñ gulāb khilātā phirūñ sabā ho kar

mirī har nishāt-o-ġham ko tirī zaat se hai nisbat
tū jo aa.e to bahārāñ tū na aa.e to ḳhizāñ hai

ḳhizāñ ke mausam meñ shaam bhī thī udaas 'bābar'
vo ban ke patjhaḌ bikhar rahī thī ajiib rut thī

sho.ala-e-gul hai zaḳhm-e-dil kī tarah
ye chaman meñ bahār hai ki ḳhizāñ

ġham, aah ishq ke ġham kā koī nahīñ mausam
bahār ho ki ḳhizāñ kab ye iztirāb nahīñ

khilā na ġhuncha-e-dil bāġh-e-dahr meñ 'afqar'
ḳhizāñ-nasīb rahā apnā gulistān-e-hayāt

ye qatl-e-ḳhizāñ par haiñ javānān-e-chaman shaad
har samt gul-o-lāla uḌāte haiñ nishāñ surḳh

ḳhizāñ ne sab kī bahār kho dī rahā na sumbul bachī na raihāñ
guloñ ko dekhā hue pareshāñ chaman se nikle ba-rañg-e-bū ham

mirī samt se use ai sabā ye payām-e-āḳhir-e-ġham sunā
abhī dekhnā ho to dekh jā ki ḳhizāñ hai apnī bahār par

ḳhizāñ ḳhizāñ ho to daur-e-bahār kyā ma.anī
bahār ho to ḳhizāñ kyuuñ bane bahār rahe

aalam nazar aa jaa.e bahār aur ḳhizāñ kā
ham zard hoñ tum phuul se ruḳhsār dikhāo

mausam-e-gul bhī hai āñkhoñ meñ ḳhizāñ
dil hī kyā baiThā chaman murjhā gayā

kis ne bahlāyā ḳhizāñ ko gul-e-tar se pūchho
gul pe kyā guzrī bahāroñ ke jigar se pūchho

rah-e-ḳhizāñ meñ talāsh-e-bahār karte rahe
vo ek tarfa sahī tum se pyaar karte rahe

ḳhizāñ-dīda thā us se pahle merā gulshan-e-hastī
mirā bāġh-e-tamannā ho gayā gulzār chuTkī meñ

kuchh talāfī nigār-e-fasl-e-ḳhizāñ
ham luTe qāfile haiñ pahle hī

shāyad ḳhizāñ sabā kā fasāna sunā ga.ī
har naḳhl-e-bāġh kaañp gayā sar se paañv tak

kise ḳhabar hai ki 'amjad' bahār aane tak
ḳhizāñ ne chaaT liye hoñge gulistāñ kyā kyā

baaġh vīrān bahāroñ meñ rahe aur 'shādāb'
phuul jañgal meñ khile fasl-e-ḳhizāñ hote hue

daraḳhtoñ par parinde lauT aanā chāhte haiñ
ḳhizāñ-rut kā guzar jaanā zarūrī ho gayā hai