Tags-Khizan

is kunj-e-dil-nashīñ meñ qabza na ho ḳhizāñ kā
jo ho guloñ kā taḳhta taḳhta ho ik jināñ kā

havā-e-fasl-e-gul meñ shorish-e-bād-e-ḳhizāñ bhī hai
kalī khiltī hai ya.anī phuul murjhāne hī vaalā hai

bū-e-gul aatī hai miTTī se chaman kī jab tak
ham pe dahshat na ḳhizāñ kī kabhī taarī hogī

sūrat-e-barg-e-ḳhizāñ jhaḌte haiñ har gaam gunāh
jab uThāte haiñ tirī raah meñ zavvār qadam

bahār nazr-e-taġhāful huī ḳhizāñ Thahrī
ḳhizāñ shahīd-e-tabassum huī bahār huī

ba-qadr-e-hasti-e-dil hai ḳhumār-e-ġham badnām
ḳhizāñ ḳharāb ba-andāza-e-bahār huī

har ḳhizāñ meñ jo bahāroñ kī gavāhī degā
ham bhī chhoḌ aa.e haiñ ik shola chaman meñ aisā

ḳhizāñ aa.ī madīne ke chaman meñ
'sharaf' rotā huā gulshan se niklā

hamesha sabz rahtā hai gulistāñ jūd-o-baḳhshish kā
kabhī bād-e-ḳhizāñ chalte na dekhī bāġh-e-ehsāñ par

shikast-e-sāz-e-chaman thī bahār-e-lāla-o-gul
ḳhizāñ machaltī thī ġhuncha jahāñ chaTaktā thā

vahshat kā ye aalam ki pas-e-chāk garebāñ
ranjish hai bahāroñ se ulajhte haiñ ḳhizāñ se

ḳhuun chhiḌkeñge sūkhī Dāloñ par
ham ḳhizāñ ko bahār kar leñge

agar qalb-o-nazar meñ vus.ateñ hoñ tere jalvoñ kī
ḳhizāñ ko bhī bahār-e-jāvedāñ kahnā hī paḌtā hai

terī nārāzgī fasl-e-ḳhizāñ hai
rifāqat gulistāñ hī gulistāñ hai

ham ne ḳhizāñ kī fasl chaman se nikāl dī
ham ko magar payām bahāroñ meñ aa.egā

aag lagā dī pahle guloñ ne baaġh meñ vo shādābī kī
aa.ī ḳhizāñ gulzār meñ jab gul-barg se gulḳhan-tābī kī

bas ki ik vasvasa-e-barg-e-ḳhizāñ-dīda hai
ḳhuld-e-imkāñ meñ shajar ho ye ye zarūrī to nahīñ

bahār ab na.e gul khilāne lagī hai
ḳhizāñ ko chaman meñ bulānā paḌegā

kabhī ḳhizāñ meñ kabhī ḳhār-o-ḳhas ke parde meñ
chaman meñ bikhre haiñ har-samt rañg-o-bū yārāñ

ye shauq kī be-nasīb kaliyāñ ye dard ke be-ḳhizāñ shagūfe
tumhāre qadmoñ meñ rakh na paa.e to kis kī chaukhaT pe jā girā.eñ