Tags-Khizan

umīd-e-samar rakh na 'shāhīñ' abhī
ki zahr-e-ḳhizāñ hai shajar meñ bahut

dīda-o-dil kī rifāqat ke baġhair
fasl-e-gul ho yā ḳhizāñ kuchh bhī nahīñ

ye zulf-o-ruḳh ye shab-o-roz ye bahār-o-ḳhizāñ
vo silsila hai ki qat-e-nazar bhī baar na ho

ḳhizāñ kī āhaTeñ sun rahī ho
merā jism bujh rahā hai

is ḳhizāñ ko sameT lo tum to
mausam-e-ḳhush-gavār kar luuñ maiñ

qabā-e-zard nigār-e-ḳhizāñ pe sajtī thī
tabhī to chaal kā andāz ḳhusravāna thā

khile ġhunche na bū phūTī na shāḳh-e-gul phalī-phūlī
qafas meñ jab se ham aa.e bahār aa.ī ḳhizāñ ho kar

shabāb kar diyā merā tabāh ulfat ne
ḳhizāñ ke haath kī boī huī bahār huuñ maiñ

afsurdagī bhī husn hai tābindagī bhī husn
ham ko ḳhizāñ ne tum ko sañvārā bahār ne

har ḳhizāñ ġhārat-gar-e-chaman hī sahī
phir bhī ik sarḳhushī bahār meñ hai

suraḳh-rū kar de sharāb aa.ī bahār
hai ḳhizāñ se zard ai ḳhummār rañg

ḳhizāñ-rasīda bahāroñ kā zikr kyā ho 'kalīm'
hameñ to kuchh bhī mohabbat meñ sāzgār nahīñ

vo chaman ab ḳhizāñ-rasīda hai
bulbuloñ kā jahāñ tarāna thā

gard-e-zulmat Daalī laale par ḳhizāñ ne ai falak
chāñd ke badle gahan meñ gul hai gul meñ ḳhaak hai

likhā thā ek taḳhtī par koī bhī phuul mat toḌe magar āñdhī to an-paḌh thī
so jab vo baaġh se guzrī koī ukhḌā koī TuuTā ḳhizāñ ke āḳhirī din the

sisaktī zindagī ko zindagānī kaun detā hai
ḳhizāñ ke baad phir se rut-suhānī kaun detā hai

zardī kī tarah baiza-e-bulbul meñ chhup rahe
is baaġh se na jaa.e miyān-e-ḳhizāñ basant

kabhī apne ishq pe tabsire kabhī tazkire ruḳh-e-yār ke
yūñhī biit jā.eñge ye bhī din jo ḳhizāñ ke haiñ na bahār ke

kyā ḳhizāñ aa.ī ki barbād huā saarā chaman
rah ga.ī āh-o-fuġhāñ gulshan-e-gulfām ke ba.ad

ye kyā ki ahd-e-bahārāñ meñ har shajar be-barg
ye kyā ki fasl-e-ḳhizāñ meñ gulāb dekhtā huuñ