Tags-Khizan

pherā bahār kā to baras do baras meñ hai
ye chaal hai ḳhizāñ kī jo ruk ruk ke tham ga.ī

ġhurūr-e-husn ai nigār kab tak chaman ke uupar bahār kab tak
rahoge zeb-e-kanār kab tak ḳhizāñ har ik gul ko tak rahī hai

yādash-ba-ḳhair ik gul-e-shādāb the kabhī
aisī ḳhizāñ paḌī hai ki kumhlā ga.e haiñ ham

ahd-e-gul se sāzish-e-bād-e-ḳhizāñ bhī kam na thī
shāḳh-e-gul se sozish-e-barq-e-balā bhī kam nahīñ

sar-gashta the mauj-e-havā se biit gayā vo mausam to ham
barg-e-ḳhizāñ kī mānind ab āvāra haiñ kohsāroñ par

idrāk ke sho.aloñ kā chaman hai mirā āhañg
maiñ barg-e-ḳhizāñ ho ke bhī gulzār-numā huuñ

jab ḳhizāñ kī nazr ho jā.egī duniyā se shabāb
yaad 'aḳhtar' ye sitam-ārā javānī aa.egī

ḳhizāñ pal-bhar meñ aayā chāhtī hai
diye jaatī hai ḳhushbū loriyāñ kyuuñ

gul nahīñ deñge kabhī bulbul-e-muhtāj ko zar
ḳhvāh sarmāya ye sab bād-e-ḳhizāñ le jaa.e

zamāna laakh use kostā rahe phir bhī
bahār janmā hamesha ḳhizāñ ne jaate hue

jaane kis gul ne chaman kī hurmateñ pāmāl kiiñ
mausam-e-fasl-e-bahārāñ bhī ḳhizāñ hone lagā

vo marġh-zār ki bīm-e-ḳhizāñ nahīñ jis meñ
ġhamīñ na ho ki tire āshiyāñ se duur nahīñ

baaġh se aa.e ho merā ghar bhī chal kar dekh lo
ab bahāroñ ke dinoñ meñ bhī ḳhizāñ hone lagī

go ḳhizāñ kā bhī daur-daura hai
phuul khilte haiñ baaġh meñ ab tak

tū ḳhizāñ meñ jo sair ko nikle
hare ho jaa.eñ be-bahār daraḳht

jab dast-e-ḳhizāñ se bikhre shīrāza-e-gul
bāñdhe raḳht-e-safar chaman se bulbul

ruḳhsat huā go daur-e-ḳhizāñ fasl-e-gul aa.ī
gulshan ke vahī haiñ sahar-o-shām abhī tak

kuchh guftugū ho aaj urūs-e-bahār se
kuchh ham ḳhizāñ-rasīda bhī hāsil sakūñ kareñ

us kī rañgat aur nikhregī ḳhizāñ meñ
ye ġhamoñ kī shāḳh hai is ko harā rakh

hazār phūloñ meñ dilkashī ho banā.e gulshan hai ḳhār-o-ḳhas par
vo kyā chaman hai ki jis chaman ne nashāt-e-daur-e-ḳhizāñ na dekhā